Madanm Wilhelmine Anette i selebre 104-an |21 December 2019
Madanm Anette zour son 104enm lanniverser yer (Portre: Sylvanne Lemiel)
Apre Madanm Alda Philo ki ti selebre son 104enm lanniverser le 14 Zilyet sa lannen, en lo madanm santener dan distrik Anse Royale, Wilhelmine Anette, ti yer le 20 Desanm li osi selebre son lanniverser 104-an.
Ti antoure avek son bann zanfan, pti zanfan e aryer pti zanfan ki Per parwas Anse Royale, Colin Underwood, ti donn li en pti benediksyon aksyon de gras anler Mont Plaisir kot son fiy Christianne Marcel avek ki i reste.
Madanm Anette, ki ti ne le 20 Desanm 1915, ti annan wit zanfan e ladan de in mor dapre son son fiy Madanm Marcel.
I annan enpe letan depi ki Madanm Anette pa vwar kler me dapre Madanm Marcel i antann byen e i ankor kapab koze menm si i pa tro kontan koz bokou. I osi pa kapab marse.
Se enn son pti zanfan ki pran swen avek li konman son carer.
Madanm Marcel i dir son manman pa malad bonnavini menm si i pa marse e pa vwar kler.
“I en dimoun ki manz byen menm si i pa manz en kantite, i napa ni tansyon, ni dyabet, i pa tro kontan manz diri me i plito kontan son bann gro manze parey patat, manyok ek bannann byen bwi e dan bomaten i kontan bwar son dite e manz son biskwi crackers ki sale, dizef ek lezot pti keksoz ki i kontan,” Madanm Marcel i dir.
I ti fer resorti ki tou lafanmir i tre kontan ki zot manman, granmanman ek granmer in ariv sa laz e ankor pe zouir en bon lasante menm si i pa vwar kler e pa kapab marse.
“Nou tou nou vreman kontan pour li e nou espere ki Bon Dye i kontinyen vey lo li e protez li,” Madanm Marcel i dir.
Yer pour son zoli lanniverser Madanm Anette ti resevwar en pannyen byen ranpli sorti kot Prezidan Danny Faure ki ti prezante avek li par ladministrater distrik Anse Royale par enterim Cultina Marcel, en lot pannyen ti prezante par MNA sa distrik Madanm Sylvanne Lemiel tandis ki group 3enm-az Anse Royale reprezante par Madanm Maryanne Rapide ti prezant Madanm Anette en zoli bouke roz.
Nou swet Madanm Anette en bonn lanniverser, tou de bon e meyer ve dan son lavi.
Marie-Anne Lepathy
