Sesel i perdi en pionye dan literatir |03 March 2016

Sesel in perdi enn bann dimoun ki’n fer en kontribisyon enorm dan domenn literatir Kreol.

Regina Melanie ti mor Mardi sa semenn a laz 83-an.

I kit deryer wit zanfan – senk garson ek trwa fiy.

A en tre zenn az madanm Melanie pa ti tro enterese avek lekol me pli tar i ti realiz son lenportans.

Apre ki i ti’n swiv laklas alfabetizasyon dan aswar, Madanm Melanie ti ekrir plizyer liv ek poenm.  Son premye maniskri avek tit ‘Remor’ ti ganny pibliye an 2012 me avan sa son bann poenm ti ganny pibliye dan bann rekey.

An 2000 ek 2001 i ti pran par dan de latelye kot Lenstiti Kreol anba tit ‘Ekrir pour zanfan ek adolesan’.

Swivan sa ti annan en piblikasyon kot Madanm Melanie ti kontribye en pti zistwar kourt avek tit ‘Lasans ti pour mirey’ ek poenm ‘Pti zwazo’, ‘Bal souri,’ ‘Memwar granmanman, ‘ ‘Mon ankor rapel,’ ek ‘Mon soufrans’.

Dan rekey zistwar kourt an 2005 i ti partisip avek trwa zistwar avek tit ‘Dife dan simityer,’ ‘Torti ek Soungoula,’ ek ‘Roz abandonnen’.

Lannen pase dan en legzibisyon pour koensid avek Semenn Lektir organize par Minister Ledikasyon ti annan en lekspozisyon anviron 30 a 40 son bann poenm ki i’n ekri me ki pa ankor pibliye.

Nou pou anmenn zot plis detay lo Madanm Melanie dan enn nou prosen nimero.