Follow us on:

Facebook Twitter LinkedIn YouTube

Archive - President Danny Faure

Ladres lo Leta Lanasyon - Prezidan Danny Faure i anons plizyer mezir dan domenn lakaz, proze irzan dan 3 housing estates | 15 February 2017

 

 

 

 Gouvernman in mobiliz larzan pour adres problenm lakaz irzan Forêt Noire/Port Glaud, Leba Les Mamelles, ek Corgat Estate vi ki leta deplorab sa bann estate i fer zot vin priyorite gouvernman.

Gouvernman pou osi pandan sa prosen 2-an konstrir 24 younit lakaz dan 24 distrik.

Roche Caïman, kot later i limite, 10 nouvo younit pou ganny konstrir e progranm lakaz lo Ile Perseverance pou kontinyen.

Prezidan Danny Faure ti donn sa bann lenformasyon dan son premye ladres lo Leta Lanasyon konman Prezidan ki i ti delivre devan Lasanble Nasyonal yer apremidi.

Prezidan Faure ti dir ki lo zil Aurore osi pou annan en proze lakaz.

“Nou pou konstrir pli o ki lo Ile Perseverance, en fason ki nou kapab optimiz later e ogmant lakantite fanmir ki benefisye. Antou nou anvizaze annan plis ki 1,500 lakaz lo sa zil,” Prezidan Faure ti eksplike.

Me i ti fer resorti ki avan sa i arive fodre ki tou bann lenfrastriktir neseser pour siport sa bann lakaz i fini enstale e sa i enkli delo, elektrisite,desarz ek lezot.

I ti fer resorti ki pli gran problenm ozordi se resours finansyel e i pour sa rezon ki i’n anons plizyer mezir pour ed gouvernman dan sa demars.

Parmi  sa bann mezir se pret 150 milyon roupi avek Fon Pansyon atraver lagreman ki i annan, bann labank in dakor pour met 200 milyon roupi dan en fon spesyal pour konstriksyon lakaz sa lannen, apartir Zanvye lannen prosenn kontribisyon CSR bann lantrepriz piblik pou al anver konstriksyon lakaz pour sa prosen 5-an, e pou osi annan en pli gran partenarya piblik/prive pour ogmant stok lakaz.

Minis responsab pour later ek lakaz i ekspekte donn plis detay lo sa size le 10 mwan prosen.

Touzour an sa ki konsern lozman me safwasi pour bann dimoun aze, Prezidan Faure in dir ki minister responsab pour Later ek Lakaz pou idantifye e met a dispozisyon kat morso later dan diferan rezyon enkli enn lo Praslin kot sekter prive pou ganny envite pour fer lakaz pour bann sitwayen aze.

“Nou pe ankouraz sekter prive pour zwe en rol dan sa sekter,” Prezidan Faure in dir.

Ansa ki konsern bann sitwayen aze ki anvi pran en lòn avek labank komersyal pour repar zot lakaz e ki ozordi zot vwar zot dan difikilte, Prezidan Faure in dir gouvernman, atraver Minister Finans, pou garanti sa lòn parey i leka avek HFC a en sonm maksimonm 75,000 roupi.

Bann portre ki akonpanny lartik i montre Prezidan Faure pe enterakte avek serten manm Lasanble apre son diskour.

 

 

 

 

» Back to Archive