Sesel i mark Lazournen Latizann Tradisyonnel Afriken |31 August 2013

Envite pe ogmant zot konnesans lo bann latizann ek plant medisinal atraver legzibisyon yer La Bastille

Divers aktivite ti ganny organize yer pour mark Lazournen Latizann Tradisyonnel Afriken ki ganny selebre le 31 Out sak lannen.

Bann aktivite yer, ki ti deroul La Bastille, ti ganny organize par seksyon resers leritaz nasyonal pour ogmant konnesans bann dimoun lo nou bann dite tradisyonnel, tel parey ki fason nou fer son bann efizyon.

Sa ti atraver en legzibisyon kot bann viziter ti kapab aprann plis lo bann plant medisinal, e bann ki ti enterese ti menm kapab ganny sans pour zot aste serten plant e bann latizann tradisyonnel tel ki bwa torti, benzwen, lanmant, parmi lezot ankor.

Ti menm annan bann liv anvant ki donn detay lo sak sa bann plant e ki fason ou kapab servi zot.
Parmi bann viziter ti annan zanfan lekol ki form par group leritaz nasyonal dan aktivite ekstraskoler. Zot ti zwenn dan en lasal kot zot ti fer bann prezantasyon lo diferan plant. La zot ti partaz zot bann dekouver atraver resers ki zot ti’n fer. Zot ti donn lorizin sa bann plant, pour kwa ki nou servi zot, ki fason i ganny prepare pour servi. E sa ki ti enteresan bann zanfan ti menm fer resorti dosaz ki sa bann latizann medisinal i devret ganny pran.