PUC i sanz konter delo |05 September 2013
Servis Litilite Piblik (PUC), ki annan plis ki 30,000 konsonmater, pe antreprann en proze pour ranplas zot bann konter (meter) delo vi ki zot in vye e pa pe anrezistre lakantite inite aktyel ki dimoun pe servi.
Dapre zofisye ansarz pour komers dan PUC, Msye Wingate Mondon, sa lakonpannyen pe antreprann en proze mazer pour ranplas tou konter ki in dekri koman basic, vedir i pa anrezistre, e pou plitar sanz bann konter ki pli vye.
En konter ki ganny refer koman basic meter i vedir son mekanizm in aret fonksyonnen me delo i ankor pe pas dan sistenm me selman i pa pe anrezistre. Dan sa sirkonstans sa bann dimoun i kontinyelman pe ganny delo me son lanrezistreman i zero.
Dan sa ka la, PUC i fer en estimasyon lo bil sa endividi an prenan kont lakantitie inite ki in servi pandan dernyen trwa mwan.
Msye Mondon ti fer resorti ki «bann konsonmater ki pe resevwar en bil ki ganny konsidere koman basic pa pe resevwar en bil normal parey tou lezot konsonmater. Zot resevwar en bil sorti kot nou bann zofisye PUC akoz i pa pe reflekte zot konsonmasyon aktyel. Alors nou PUC nou travay lo zot bil dapre nou kalkilasyon pour estimasyon an prenan kont bil sa trwa dernyen mwan sa konsonmater,» Msye Mondon ti dir.
An term proze ki zot pe fer an relasyon avek bann basic meters, depi komansman lannen i annan an mwayenn 2,000 sa bann konter e ladan 700 in fini ganny sanze e i reste 1,300 pour PUC fini travay lo la e konplet sa proze ki i pe antreprann.
Proze li menm in ganny enpe retar prenan kont ki PUC pe osi antreprann en lot pti proze e sa se met bann konter lo en console, sa i vedir zot pe elev bann konter ki’n ganny tale ater. Sa i a permet bann zofisye PUC pour fer zot louvraz pli fasilman e osi evite ki sa bann konter i ganny andomaze vi ki zot bann lokasyon aktyel i parfwa ganny konpromet avek salte, debri e osi transpor ki mont lo zot.
Pour ede konplet sa travay lafen sa lannen, PUC pe osi resevwar led prive. Sa bann konter pe ganny sanze vi ki zot dirabilite in ariv a laz e zot performans in redwir. Dapre Msye Mondon zot ganny apepre 100 a 200 konter ki vin basic tou le mwan.
Proze pour ranplas sa bann konter in fini demare e pou bouz dan rezyon Cap Ternay, swivi par Port Launay, Port Galud epi dan was ek sid Mahé. Sa i spesyal akoz dan bann landrwa elwanye, bann konter i reste pli lontan basic konpare avek bann ki dan lavil.
En zofisye PUC pe enstal en nouvo konter