Aktivite pour sitwayen aze i repran |10 September 2013

Bann dimoun 3enm-az partou lo Mahé pe sa semenn partisip dan bann vizit ki divizyon progranm ek bann levennman spesyal dan Departman Devlopman Kominoter in organize pour zot dekouver bann sit ek landrwa enteresan dan pei.

Sa seri tournen dan bis pour sa bann dimoun aze i tonb dan kad progranm 3enm-Az an Mouvman ki ti la depi lontan me ki pour en pe letan pa ti osi aktiv.

Larout pour sa bann tournen i Perseverance, Eden Island, Val d’Andorre, Sant Biodiversite avan ki bann partisipan i retourn kot zot apre ki zot in arete pour pran zot goute osi dezennen.

Responsab divizyon progranm ek bann levennman spesyal dan Departman Devlopman Kominoter, Madanm Sylvianne Lemiel, i dir ki la aprezan sa progranm in relanse avek plis viger e sa seri tournen i demar bann aktivite dan kad sa relansman.

Yer bomaten 15 dimoun aze sorti dan 4 distrik parmi sa 8 ki tonb dan rezyon Les-Santral 2 (Mont Fleuri, Plaisance, Roche Caïman, Les Mamelles, Cascade, Pointe Larue, Anse Aux Pins, Au Cap) ti pran bis kot Marine Charter anvil pour zot tournen en zournen otour Mahé.

Zot ti ganny akonpannyen par Madanm Jenita Laporte ki responsab aktivite pour dimoun aze dan sa minister, Madanm Jeanne D’Arc Gerry ki responsab mouvman 3enm-az lo nivo nasyonal, e osi bann responsab sak bann klib dan distrik.

Madanm Doris Kiwale, administrater distrik Les Mamelles, ki responsab pour kordin bann aktivite 3enm- az lo nivo rezyon Les-Santral 2, ti la pour asire ki tou bann partisipan ti prezan.

I ti fer resorti ki bann aze ti’n ganny divize an plizyer group pour fasilit sa bann vizit e ozordi en lot group sorti dan sa 4 lezot distrik dan sa rezyon pou fer menm traze.

«Nou’n profite koman larantre lekol in komanse pour fer sa bann aktivite akoz plizyer bann 3enm-az i tant pour vey zot bann pti zanfan pandan vakans,» Madanm Lemiel ti dir.

I ti fer resorti ki sa bann aktivite i annan pour bi egey sa bann dimoun e osi edik zot lo bann diferan devlopman ki pe arive dan pei.