Lafet parasol in ariv ankor ? |12 September 2013

I fer en pe letan ki nou pa ti’n ganny en gout lapli e pandan sa de trwa mwan nou kotidyen in dominen par lasesres e bann konsekans ki i kapab anmennen : larivyer sek, lapousyer, restriksyon delo enpoze par PUC e bowzer ki bezwen anmenn delo ziska kot nou lakaz.

Ti’n menm prevwar ki lapli pa ti pou tonbe avan Novanm ; lozik kan nou konnen ki lasezon lepli i ariv avek lafen vannswet e ki i souvan noy bann premye zour Festival Kreol pandan dernyen semenn Oktob. Konmsi lasezon kreol ti vedir lasezon lapli !

Sepandan, depi wikenn Biro Meteorolozi ti’n anonse ki apartir komansman sa semenn Mahé ek bann zil pros ti pou eksperyans en kondisyon nyaze ki ti pou anmenn lapli pandan trwa a kat zour. Sa benediksyon ki Seselwa ti pe espere avek enpasyans in arive depi Mardi swar kot ziska yer bomaten stasyon erport tousel ti’n rikord 16 milimet lapli.

Biro meteorolozi in sepandan prevwar ki sa kondisyon pa pou dire e ki nou pou rekonmans eksperyans en letan so e sek apartir lafen lasemenn. Annou espere kanmenm ki sa pti lapli a aroz later, fer reviv bann plantasyon e fer repouse zerb ki ti’n komans sek.

Pli enportan, annou swete ki i a met en pe delo dan larivyer e ogmant nivo danm La Gogue pour ki pandan sa omwen ankor de mwan lasesres, nou pa ava tro soufer.

Fodre osi fer atansyon ki nou pa mouye akoz konmdi sanson « gren lapli pa mouy mwan akoz sa lafyev i move » e osi pa obliye pour anmas en pe delo pour letan dir !

Annou osi fer sir ki bann rigol pa bouse e bann larivyer e lanmar in debloke pour nou kapab evit en katastrof parey sa enn ki gro lapli ti okazyonnen an Fevriye sa lannen.