Zabitan St Louis i regroupe pour mye zer zot kominote |16 September 2013
Se avek bi mye zer zot kominote fas a bann defi sosyal e osi kriminalite ki pe kontinyelman ogmante, ki en group zabitan St Louis, pli presizeman dan kanton Basen St Louis, ti zwenn ansanm an Zanvye sa lannen e deside regroup zot dan en lasosiasyon.
‘Lasosiasyon pour Promouvwar Latrankilite e Respe’ parey i apele, ti organiz en latelye dan lasal konferans Lungos Orion Mall Sanmdi pase avek bi prezant zot leksperyans e osi benefisye avek konsey e soutyen lezot partener tel ki lapolis e departman Servis Sosyal ki a permet zot devlop en plan daksyon pour zot lasosiasyon.
Dapre tyermenn ‘Lasosiasyon pour Promouvwar Latrankiite e Respe’, Msye Donald Ernesta, zot vizyon se amelyor lavi kominoter par anmenn tou dimoun ansanm e devlop en santiman linite, devouman e bon vwazinaz dan kominote. Lasosiasyon i osi viz ver konbat lensekirite ek krim e devlop en latitid ekoute e partaze anver bann ki pli vilnerab.
«Ver milye lannen pase, nou ti realize ki dimoun dan nou kominote ti pe tro viv sakenn pour li e voler ti pe tro profit lo sa febles. Nou ti deside pour vey voler nou menm, atrap zot e met zot dan lanmen lapolis. Anmenmtan nou pe vwar ki mannyer nou kapab rezourd lezot defi ki ti pe frap nou vwazinaz,» Msye Ernesta ti dir.
Bann aksyon ki sa lasosiasyon in deza antreprann i konpri fer port-a-port pour sansibiliz bann zabitan, organiz patrol an group dan zot sou distrik e netway bann landrwa kot aktivite antisosyal tel ki konsonmasyon drog ek lalkol i kapab deroule e kot voler i kapab kasyet.
Bann lezot partener in tre byen akei linisyativ sa bann zabitan St Louis. Departman Servis Sosyal par egzanp, atraver konseye spesyal Madanm Marie-Joseé Bonne, in dir ki sa linisyativ i antre byen dan progranm renesans sosyal e ki bann zabitan pa devret selman rode koman pour rezourd problenm kominoter, me ki zot osi devret pli byen servi bann fasilite e striktir distrik tel ki biro ladministrasyon distrik, lekol, klinik, sant kominoter, eksetera.
Lo kote lapolis, responsab lapolis kominoter, lenspekter Nancy Henry, in fer remarke ki i annan bokou lanfaz aprezan lo sa servis lapolis kot lobzektif i non selman protez lavi e propriyete atraver deteksyon e prevansyon krim, me osi en pli bon partenarya avek lakominote. I ti azoute ki i osi enportan ki bann rezidan i vin pli enformen, pli prepare e pli alert pour zot kapab idantifye e raport aktivite sispe ou kriminel avek lapolis e osi antre zot vwazen.
Lezot manm komite ‘Lasosiasyon pour Promouvwar Latrankilite e Respe’, ki son moto i ‘Ou pa pou tousel’ i konpri Madanm Isabelle Quatre, Madanm Micheline Marie, Msye Antoine Poris, Msye Jeamie Dogley e Madanm Mary Simeon.