Josephine Bibi i selebre son 102enm lanniverser |25 September 2013

Dimans le 22 Septanm ti en zour tre spesyal pour Madanm Josephine Bibi.

En rankont spesyal ti’n ganny organize sa zour kot lakour enn son fiy, Ginette Gamatis dan distrik Port Glaud, a lokazyon 102enm lanniverser Madanm Bibi.

Antoure par son bann zanfan, pti zanfan, aryer pti zanfan, plizyer lezot manm fanmiy ek zanmi, Madanm Bibi ti fet son zour spesyal avek bokou lazwa.

Sa madanm 102-an i en legzanp pour bann lezot trwazyenm-az vi ki i ankor en madanm for e an bonn sante pour son laz.
Madanm Bibi ti annan set zanfan me enn parmi in mor ki aprezan reste kat fiy ek de garson.

Prezan pour sa lokazyon ti Minis pour Devlopman Kominoter, Lazenes ek Spor Vincent Meriton ek manm Lasanble Nasyonal pour distrik Port Glaud Sultane Jacqueline.

Lazournen Madanm Bibi ti konmans avek en lanmes spesyal pour remersye Bondye pour fer li arive selebre son 102enm lanniverser e pour son lasante.

Minis Meriton ti prezant Madanm Bibi avek en pannyen ranpli avek bann diferan keksoz nourisan ki pou ed li gard en bon lasante.

Sa pannyen ti ganny prezante lo lapar Prezidan James Michel.

Dan prezans tou bann envite Madanm Bibi ti koup son zoli gato ki ti dan laform en sapo e answit anmize dan sa lafet spesyal.