Rich Naiken i ranport en KIA Cerato dan lotri Regatta |01 October 2013

Rich Naiken ki reste Au Cap i gannyan sa loto KIA Cerato, pri spesyal aktivite Regatta organize par Seychelles Round Table no 2 (SRT2).

Parey tou le lannen, Seychelles Round Table no 2 ti organiz aktivite Regatta lo lans Beau Vallon pandan trwa zour – depi Vandredi 27 ziska Dimans 29 Septanm.

Parey bann lezot lannen, bokou dimoun ti desann pour vin partisip dan sa aktivite. Bokou aktivite ti’n ganny organize pour sa lokazyon tel ki sport, grenp poto lagres parmi lezot ankor.

Sa lotri i tou-l-tan ganny tire alafen trwazyenm zour sa aktivite. Sa lannen pri spesyal lotri – en loto KIA Cerato – ti ganny sponsor par KIA motors ek SRT2.

Konpare avek bann lannen avan sa voyaz dan plas servi masin pour tiraz en group zanfan ti ganny loner pour retir bann bi dan bwat pour ganny nimero gannyan bann pri.

Parey tou le lannen, larzan ki ganny ranmase atraver lavant tiket i ganny servi pour bann zes saritab. Sa lannen SRT pa ankor deside ki proze zot pou fer. Bann dimoun ki pa’n sanse sa lannen zot touzour kapab reklanm zot 10 roupi dan sa promosyon ki laboutik Grocer’s pe ofer zot.