Follow us on:

Facebook Twitter LinkedIn YouTube

Archive -Seychelles

Aktivite pour komemor Lazournen Enternasyonal Dimoun Aze |02 October 2013

‘Konsakre zot lavi dan lapriyer entans’


En gran lafoul dimoun aze sorti dan kat kwen Mahé, Praslin, La Digue e menm Silhouette ti rasanble yer bomaten dan lasal Konsey Nasyonal pour Spor (NSC) Roche Caiman pour en gran lanmes ki ti’n organize pour demar bann aktivite pour Lazournen Enternasyonal Dimoun Aze yer.

Sa lanmes, ki ti selebre par Per Lonnie Adrienne, ti tre vivan e son Gloria, Credo ek Notre Père ti an Laten –  keksoz ki bokou bann dimoun aze ti byen apresye e zot ti fer sa resorti a traver zot partisipasyon aktiv ki ti fer vibre lasal.  Fodre dir ki sa lanmes ti animen par en lakoral bann dimoun aze sorti dan plizyer distrik.

Prezan pour partisip dan sa seremoni a kote nou bann dimoun aze ek lezot envite ti Minis responsab pour Lanplwa, Manmzel Idith Alexander, ek Minis responsab pour Zafer Sosyal, Devlopman Kominoter ek Spor Msye Vincent Meriton, ki ti osi lir premye lektir.

Dan son lomeli, Per Lonnie ti demann bann dimoun aze pour konsakre zot lavi ek zot letan dan lapriyer entans la ki zot annan ase letan aprezan.

«Nou bann dimoun aze zot en gran sours larises ek lasazes pour nou pei e bokou zot pe konsantre dan lapriyer e zot pe ganny lenerzi ek lafors dan legliz ek parol Bon Dye.  I enportan ki nou priye e ki nou priy bokou,» Per Lonnie ti dir.

I ti fer remarke ki tandis ki bann dimoun ki pli zenn zot konsantre dan zot travay ek lezot responsabilite pour devlop nou pei, bann aze zot devret kontinyen priye akoz lapriyer i pwizan e nou bezwen lapriyer pour kapab fer fas a tou sa bann kalamite ki pe arive dan lemonn ozordi.

Vi ki yer ti osi lafet Sent Thérèse, patronn legliz Plaisance, Per Lonnie ti profite pour koz enpe lo lavi sa zenn fiy ki byen zenn ti tann e santi lapel Bon Dye pour vin en relizyez e dedye son lavi pour ed lezot.

I ti fer remarke ki Sent Thérèse ti en dimoun ki ti priy bokou e nou devret pran li koman en bon legzanp.
 
Madanm Sylvyanne Lemiel, responsab Departman pour Progranm ek bann Levennman Spesyal dan Minister Devlopman Kominoter, i dir ki bann dimoun ki’n vin partisip dan lanmes sa lannen in depas zot lekspektasyon.

«Lasal in vreman plen e tou sa 300 a 400 sez ki nou ti’n rode pa’n ase menm,» i ti fer resorti antretan ki bann dimoun ti ankor pe kontinyen vini.

Madanm Lemiel ti osi azoute ki pour sa lannen olye zis retourn dan lakour apre lanmes bann dimoun aze ti pou pas sa apremidi ansanm dan en latmosfer detant avek plizyer aktivite kiltirel animen par en benn kopoze avek bann dimoun aze zot menm apele ‘Benn Granmoun’.

Ti osi annan lavant manze ek labwason e osi lezot pti manzay ki bann dimoun aze i byen apresye parey ladob ek salad mang.

«Nou’n anvi fer keksoz enpe spesyal sa voyaz e nou vreman apresye e remersye tou bann dimoun ki’n ed nou organiz sa levennman e osi ISPC ek STC pour zot sponsorship,» Madanm Lemiel i dir.

Aktivite kiltirel par bann granmoun ti ale ziska tar dan apremidi. 

» Back to Archive