Fermye i re-elekte tyermenn Benstrong pour en nouvo manda |12 October 2013

Serge Benstrong in ganny re-elekte koman tyermenn Lasosiasyon bann Fermye Sesel (SeyFa) pandan zot miting zeneral anyel ki ti fer Zedi apremidi kot Maison Football, Roche Caïman.

Parmi bann lezot manm ki’n ganny elekte lo komite egzekitiv i Armand Michaud koman vis-tyermenn, Jeanne D’Arc Marie koman sekreter e trezorye i David Marie.

Lezot manm i Andre William ki en manm ordiner, en reprezantan bann zenn fermye Barry Emmanuel e en reprezantan madanm Rose Mary Edmond.

Pandan ki i ti pe adres lodyans apre ki i ti’n ganny re-elekte, Msye Benstrong ti dir ki enn son bi se pour ed fermye retrouv zot plas akote bann lezot dan sekter biznes.
«Enn nou vizyon la se pour inifye bann fermye. Nou santi ki bann fermye i devret konpran idantite lasosiasyon, vizyon ek misyon,» i ti dir.

Msye Benstrong in azoute ki lasosiasyon i devret vwar son rol anba nouvo devlopman dan pei.
In osi fer resorti ki bann fermye lokal pe fer fas avek bokou konpetisyon avek bann prodwi enporte e ki ansanm zot devret trouv bann nouvo fason pour fer zot biznes marse fas a sa bann defi.

Msye Benstrong in dir ki vizyon lasosiasyon i pour devlop bann partenarya solid avek bann lenstitisyon e bann biznes agrikiltir pour kapab ede fer marse bann stratezi.

Pandan sa miting, ti annan prezantasyon ek laprouvasyon rapor tyermenn pour 2011 a 2012 e osi rapor finansyel pour 2011 ki’n ganny odite.
Ti osi annan prezantasyon e laprouvasyon plan travay e bidze lasosiasyon pour lannen 2014.

Bann lezot pwen dan sa rankont ti kat rezolisyon ki ti ganny pase e aprouve.
Avan ki sa prosesis eleksyon ti ganny fer, bann fermye ti ganny sans partisip dan en sesyon kot ti annan bann diferan prezantasyon fer par bann partener kle.

Minis pour Resours Natirel Peter Sinon ti parmi bann ki ti prezan pour sa sesyon.

Ti osi annan en sesyon diskisyon apre ki sa bann prezantasyon ti’n terminen kot bann fermye ti esanz lide e met devan zot bann konsern.