Premye Lasanble Lazenes i termin son manda


06-July-2004

Sa bann zenn onorab in aprezan sed zot plas a en nouvo group zenn ki pou form par Dezyenm Lasanble Nasyonal Lazenes lafen sa mwan. 

Bann manm premye Lasanble Lazenes dan en portre souvenir apre ki zot ti'n resevwar zot sertifika
 
Prezan kot seremoni klotir ti Minis pour Ledikasyon ek Lazenes Danny Faure , lezot zofisye sa minister, Speaker Lasanble Nasyonal Francis MacGregor, bann zofisye lazenes, bann envite e bann manm Lasanble Lazenes.

Dan son diskour Speaker Premye Lasanble Lazenes, Clifford Andre, ti fer en remersiman spesyal pour tou dimoun dan Minister Ledikasyon ek Lazenes ki’n donn zot sipor pandan sa lannen ki’n pase.

I ti osi retras en pe bann pwen for travay lasanble zenn, tel ki bann dyalog avek diferan minister, asiste diferan latelye ek prezantasyon ensi ki debat lo plizyer size ek mosyon.
Lo son kote Minis Faure ti dekri sa bann zenn onorab koman bann fondater Lasanble Nasyonal Lazenes e i ti remersye zot pour akonpli zot devwar ensi ki pour bann sakrifis, disiplin ek langazman ki zot in fer pour reisi akonpli lobzektif sa progranm. 
 
“Nou dan Departman Lazenes nou ankor konvenki ki proze e progranm Lasanble Nasyonal Lazenes i enn ki tre edikatif, enn ki donn lankadreman lo nivo leadership pour bann zenn e enn ki donn formasyon sivik nou lazenes,” Minis Faure ti dir.

Minis ti azoute ki i tre kontan pour aprann ki bann zenn onorab sa Premye Lasanble Lazenes pou form en lasosiasyon ki a fasilit travay prosen e fitir onorab sa lasanble. 
  
Sa seremoni ti osi vwar prezantasyon sertifika par Minis Faure e Speaker MacGregor avek bann zenn onorab swivi par detrwa mo remersiman fer par en manm sa lasanble, onorab Frank Moumou.  
Avan ki seremoni klotir limenm ti komanse, sa lasanble ti osi diskit lo zot dernyen mosyon “Children’s Rights and Responsibilities” met devan par zenn onorab Allen Labonte.

Send your comment :

Name *

Email *

Comment *