RASA GB in rantre lo lasenn lanmizik


10-July-2004

Formen depi  Zilyet 2003 sa group i annan sis manm ki sante e dapre lider group, Alvin Bastienne, zot non i reprezant bann manm sa group: Sa i Ritval, Patrick aka Refugee, Romena (R), Alvin (A), Sarah (S), Alex (A).GB i vedir Girl ek Boy, vi ki i annan garson osi byen ki fiy dan sa group.

Lentansyon nou lanmour ki deza lo marse depi en semenn, pe fer bokou sikse avek bann sanson tel ki Lekel, Pardon Manman, Soukous RASA GB e Lenportans nou lanmour, ki osi tit sa albonm.

Dapre Alvin Lentansyon nou lanmour i en zefor kolektiv tou bann manm e i santre plis lo lanmour.

Sa albonm 10 sanson i konpri en varyete stil lanmizik tel ki reggae, dance hall, ragga, R&B, samba.

Alvin in dir ki pour bann lokazyon tel ki Nwel zot anvizaze fer en koleksyon sanson vals ek sega.

“Nou pa zis la pour sante me osi pour pas bann mesaz pozitiv avek lezot ensi ki donn bann bon konsey,” Alvin ti dir.

Alvin ti osi azoute ki tre byento manm piblik pou tann ankor lezot sanson sorti kot RASA GB e zot menm pe anvizaze aprofondir dan lanmizik lokalman ensi ki lo lasenn enternasyonal.

Apard bann manm ki sante dan sa group, RASA GB i annan en manager/promoter Gustave Decommarmond e pe osi ganny led de zanmi Jeau Paul ek Stephana.  
Sa group zenn tre pozitiv ti eksprim swe ki bann artis lokal i travay ansanm  pour anmenn lanmizik Seselwa a la oter.                                                                       

N.J    

Send your comment :

Name *

Email *

Comment *