Aksidan Capucin-De zonm i admit lopital avek zenou ek lazanm kase


20-July-2004

 

Sa aksidan ti ariv lendi bomaten an desandan semen Capucin, Anse Aux Pins. An rezilta, de zonm in admit lopital avek zenou ek lazanm kase.         Sa pick-up apre ki i ti'n kit semen e al tap avek en pye mang

Enn in kas lazanm e lot son zenou. Zot osi annan blesir lo diferan parti zot lekor. Kondisyon sa de zonm in ganny dekri konman stab.

Sa de zonm, ansanm avek wit lezot dimoun, ti pe al travay letan sa pick-up trwa tonn long wheelbase mark Mitsubishi Canter ki zot ti ladan ti kit semen Capucin e al tap avek en pye mang. Aksidan ti ariv ver 7er30.

Sa wit lezot zonm, enkli drayver, ki ti ganny transporte klinik Anse Aux Pins e plitar lopital Victoria, ti ganny large apre konsiltasyon.

Sa pick-up ti pe diriz dan direksyon borlanmer e dapre drayver, Jeffrey Larue, ler i ti pez fren i ti santi ki ti napa nanryen e i ti bezwen say son transpor dan direksyon sa pye mang pour evite al tap dan bann lakaz pli ba.

Touzour dapre drayver Larue, sa pick-up i propriyete kontrakter France Jérémie e ti pe al fer service.

Antretan lapolis in ouver en lanket pour determin vre lakoz sa aksidan.

Send your comment :

Name *

Email *

Comment *