50 Gard Nasyonal i pret serman |09 August 2004

Fodre fer rapel ki youniform Gard Nasyonal oparavan ti sann.

Seremoni pret serman ti deroul kot Lakademi Militer, Lil-di-Swet e ti ganny asiste par Sef Deta Mazor SPDF, Kolonnel Leopold Payet, lezot zofisye militer ensi ki paran ek zanmi sa bann nouvo gard.

Parmi sa senkantenn gard, en premye group ti konmans zot lantrennman an Avril tandis ki en dezyenm group ti konmans an Me. Lantrennman ti dir pour apepre kat mwan.
 
Pandan sa seremoni gard ki’n fer pli byen an zeneral, Lindy Amade, ti ganny rekonnet, tandis ki Steven Hollanda e Johnny Mirabeau ti osi ganny sakenn en pri pour sorti meyer dan zot group respektif. 

Dan son ladres ki i ti fer apre ki i ti’n enspekte sa bann gard, Kolonnel Payet ti fer resorti ki vizyon SPDF se pour transform sa younit e fer li vin enn pli efikas e profesyonnel.

“Nou osi oule ki sak lenstitisyon ek endividi ki asosye zot avek Gard Nasyonal i annan konfyans dan kapasite sa lafors pour donn zot en servis sekirite enpekab,” i ti dir.

I ti anonse ki en nouvo progranm lantrennman pli o nivo e pli entansif in ganny entrodwir pour asire ki bann gard i vreman kapab delivre sa kalite servis ki bann lenstitisyon i demande. SPDF, i ti dir, pa satisfe avek nivo ki egziste konmela e sa i fer ki sa nouvo progranm pa pou aplik zis pour bann nouvo gard me menm bann ki’n la depi avan, Kolonnel Payet ti dir.

Bokou lanfaz pou osi ganny mete lo disiplin, i ti azoute, e SPDF pa pou toler serten mank displin parey bann gard ki al travay anba lenfliyans lalkol, ki pa konport zot byen e ki dezonor zot youniform.

“Gard Nasyonal i en lafors kot i devret annan respe ek lapolites e tou manm i devret onnet e respektab,” Kolonnel Payet ti dir.

Dan en pti diskour remersiman Monique Leon ti dir ki zot santi zot fyer pour zwenn sa lafors pour ede dan domenn sekirite dan pei pour asire ki Seychelles i reste tou-l-tan dan lape e stabilite e touzour ganny rekonnet par bann viziter koman en landrwa kot i annan trankilite.

“Nou asire ki nou pou kapab delivre nou responsabilite avek konfidans e fer ki Gard Nasyonal i vin en lafors pli efikas,” i ti dir.

I ti azoute ki sa devouman, devosyon ek perseverans ki’n permet zot termin zot lantrennman avek sikse, pou osi ed zot sirmont tou bann lobstak ki zot ava rankontre dan zot travay.

Apre zot sermantasyon, sa bann gard ti ganny benediksyon Dyak Louis Agathine.
Seremoni ti termin avek en parad.