MESAZ PREZIDAN MICHEL POUR LANNEN 2005 |31 December 2004

En zour noun ganny balye par lanmer, e nou pann menm ganny sans konplet en levanter dega, kan nou ti ganny inonde par lapli toransyel.

Me, frer ek ser Seselwa, sa ki mon war remarkab se ki dan tou landrwa ki monn pase lo Mahé, Praslin ek La Digue, mon pann war en lebra kin tonbe dan defayans, ouswa en figir kin noye dan dezespwar. Partou kot mon’n pase, mon’n konstat sa rezilyans, sa kouraz pour sirmont sa katastrof natirel. Sa in fer mwan realize ki lepep Seselwa i gran e son konsyans i for.

E ler nou ti rasanble yer dan Katedral St. Paul pour en servis par nou de legliz prensipal mon ti pli konveki ki zanmen ki se nou lespri fraternel, nou linite, nou konpasyon e nou sans solidarite ki bann valer ki karazteriz nou koman en pep.

I vre ki ler nou get sa ki ankor pe pase otour nou da Losean Endyen, ler nou get sa kantite lekor ki pe kontinyen ganny detere e antere – kiswa Sri Lanka, Lenn, Lendonezi, ouswa Taylenn, Maldiv ek Somali – i fer nou realize ki nou’n ganny eparnnyen en kantite douler kot lavi imen i konsernen.

Me douler, malgre son diferan degre, i reste douler. E nou kapab dir ki nou’n pas dan kou e soufrans sa bann dernyen zour, e ki nou pe kontinnyen ganny tromatize par sa bann dega e par sa leksperyans orib.

Sa fanmiy ki’n perdi enn son manm, sa ki’n perdi lakaz, sa ki’n perdi son pake, son bann souvnir, sa ki zot biznes in ganny afekte, sa kin perdi son bato, son loto eks – tousala in fer ou realize ki nou vilnerab avek kapris lanatir.

 
Nou ti pe get lannen 2005 avek bokou optimizm ; la nou bezwen osi get li avek plis prevwayans, e avek bokou plis prekosyon. Me nou osi bezwen get li avek plis determinasyon, konviksyon ek kouraz pour nou sirmont bann difikilte aktyel e afront lezot defi ki konfront nou nasyon.

Si nou gard menm lespri solidarite antre nou, e menm lavolonte travay ansanm e ed kanmarad, ki nou’n montre pandan sa dernyen kat-senk zour, mon konveki ki nou pou sirmont tou defi ki devan nou.

En tel loportinite ki mon annan pour adres zot a lokazyon sa nouvo lannen pa pour konplet si mon pa profite pour remersye tou sa bann dimoun a traver nou bann zil ki pan’n arete travay, zour e nwit, pour ed nou frer ek ser ki dan maler, e dan soufrans, e pour fer sir ki nou pep pa perdi son sanfrwa.

Bann travayer servis esansyel tel ki PUC, SPTC, Lapolis, Larme, Lasante, Servis Tenny Dife, Brigad Dirzans, Lakrwa Rouz, Ladministrasyon Distrik, vwazen kin ed vwazen – bref, tou Seselwa k’in la pour son kamarad.

Frer ek Ser, nou’n fer sakenn antre nou konte pour nou prosen dan sa moman difisil.

Lannen prosen annou ankor en fwa fer sakenn antre nou konte, sa voyaz pour kontinyen konstrir nou pei e anmenn li sa lot pa pli devan, parey mon ti fer lapel avek zot dan mon prezantasyon Bidze 2005.

Noun dedye lannen prosen pour nou zanfan, e set a traver nou zanfan ki nou pou kontinnyen konstrir lavenir.

O fon mon leker, mon oule remersye zot tou e dir zot ki mon fyer ki nou form parti sa menm lekip nasyosal Sesel ... sa menm lekip ki pou repran travay serye pour nou pei le 4 Zanvye.

O non mon gouverman, e an mon non personnel, mon swet zot tou, e tou Seselwa ki a letranze, en bonn e erez ane.

Ki Bondye i veye e beni nou pei ek nou pep dan sa nouvo lannen.

Bonswar e Bonn Fet.