Trafik drog ilegal |07 May 2005

Sa trwa dimoun -- en zonm 52 an, en madanm 53 an e en fiy 17 an -- ti ganny arete dan en lakaz Pointe Larue apre ki lapolis ti dekouver e sezi serten kantite hashish ek kanabis swivan en lafouy fer dan sa lakaz. 

Apard drog, plizyer lobze koupant ti osi ganny sezi o kour sa loperasyon.
Antretan lapolis in osi raporte ki sa zonm 47 an ek son madanm ki annan 31 an ki ti ganny arete wikenn pase kot zot Petit Paris pour menm lofans in egalman pas ankor ankour Vandredi apremidi.  Zot sepandan pe rimann Ile Longue ziska Vandredi le 20 Me 2005.

Lanmor Roy Freminot

En zonm i ganny sarze pour mert

Sa zonm sispe dan lanmor Roy Freminot, 27 an, dan Bodanmyen Anse Aux Pins, in ganny sarze pour mert. 
Sa zonm, ki annan 55 an, pe rimann Ile Longue ziska son zafer i terminen. 

Freminot ti ganny deklare mor arivan lopital Lendi swar (2 Me) apre ki i ti'n ganny pike dan son lestoman swivan en diskisyon kot en lakaz dan Bodanmyen, Anse Aux Pins.