5 dimoun i admit lopital swivan aksidan pandan wikenn |10 May 2005
Dapre en kominike lapolis sa fiy 16 an, ki reste Baie Ste Anne Praslin, i admit dan ICU lopital Victoria depi Dimans apremidi swivan en aksidan ki ti arive Anse Reunion, La Digue.
Sa fiy, ki ti lo en bisiklet o moman aksidan, ti fer kolizyon avek en pick-up e in sibir dimal en pe partou lo son lekor.
An rezilta en lot aksidan separe ki ti ariv Mahe, 4 zonm i admit lo ward lopital Victoria apre ki pick-up ki zot ti ladan ti tap deryer en bis Tata vizavi Michel Apartments Les Mamelles Sanmdi swar.
Parmi sa 4 zonm i annan ki'n kas lazanm, i annan ki'n ganny dimal dan latet, blese dan figir e lezot dimal.
Zofisye servis tenny dife ti bezwen entervenir pour retir drayver ki ti'n pri dan son pick-up ki ti'n savire swivan lenpak kolizyon.