Zefor i kontinyen pour remet sitiasyon delo anba kontrol |10 May 2005

Sa lanons ti ganny fer par zofisye relasyon piblik kot PUC, Linda Philoe, ler i ti pe koz avek lapres Lendi 9 Me apremidi lo size "delo gri" ki bokou lakour dan rezyon santral ti pe resevwar semenn pase.

Vandredi pase PUC ti dir ki sa sitiasyon in ganny rektifye me i paret ki pandan wikenn sitiasyon in vin pli pir e ki rezyon les osi in komans ganny sa "delo gri".

Madanm Philoe ti dir ki apre ki delo ti'n komans retourn son kouler normal, zot ti oblize servi laliny Hermitage pour distribye delo dan rezyon les anvi ki Cascade larivyer ti sek, me malerezman delo in rekonmans destabilize e manm piblik dan Anse Aux Pins in osi resewar sa delo gri.

Ler i ti pe eksplik lakoz sa delo gri, Msye Ian Charlette, en bio-chemist  kot PUC, ti dir ki zot pa ti pe met soda ash dan delo anvi ki ti annan en mankman e sa in ede pour destabiliz delo.

I ti azoute ki lefe ki tiyo i vye ek ki i annan korozyon sa in fer sitiasyon pli grav.
Dapre zofisye sinyor dan seksyon saniter, Eulalie Sabury, tes ki zot in fer i prouve ki sa delo i lo standar.

Madanm Sabury in dir ki dapre rezilta tes sorti kot biro standar delo i annan en nivo fer ase o ladan, ki donn li en sanzman dan kouler, loder ek gou.

Toudfwa, direkter zeneral pour lasante kominoter, Dr Jude Gedeon, in konsey manm piblik pour pa bwar sa delo pour le moman ziska ki i retourn son kouler normal e ki antretan zot kapab servi delo mineral pour bwar.

Antretan PUC in osi anonse ki apartir ozordi zot pe enpoz restriksyon delo dan serten rezyon.