Lasesres-PUC i enpoz restriksyon lo delo trete |11 May 2005

Zofisye ansarz relasyon piblik, Linda Philoe, in eksplike ki i neseser pour pran serten mezir pour kontrol distribisyon delo trete la konmela, akoz an rezilta sa letan sek, delo dan laplipar zot bann sistenm stokaz ek rezervwar pe diminyen tre vit.

Nivo delo dan danm La Gogue par egzanp ti'n ariv 55% Mardi tandis ki nivo delo dan danm Rochon i 67%. Anvi ki delo dan basen Le Niol in osi diminyen, PUC pe aprezan bezwen pran delo Rochon pour distribye dan plizyer landrwa dan Nor e sa pe met plis presyon lo sistenm distribisyon.

Manmzel Philoe in dir ki sitiasyon in agrav enpe akoz PUC in osi bezwen servi bokou delo pour netway sistenm distribisyon kot zot ti pe eksperyans sa problenm delo gri.

Pour le moman, i ti dir, stasyon desalinasyon Providence pe eksperyans serten problenm avek son sistenm elektronik e ti pe prodwi zis 50% son kapasite normal.

Avek sa restriksyon tanporer plizyer landrwa pou ganny delo ant 5er bomaten ek 10er diswar. Sa bann landrwa i depi Victoria ziska Nort East Point, Victoria ziska Cascade, Anse Aux Pins, Anse Royale, La Louise, Fair View, Belvedere, Bel Air, Sans Soucis, St Louis, Pascal Village, Serret Road, Belonie, Ma Constance, Le Niol, Bel Ombre, Beau Vallon, Glacis e Takamaka.

Bann landrwa ki pou pli ganny afekte se Morne Blanc, dan leo Anse Louis, La Misère (dan leba e dan leo). Sa bann landrwa pou ganny delo zis pour enn ou 2er-d-tan par zour.

La Misere dan leo pou ganny delo ant 5er apremidi e 6er diswar, tandis ki La Misere dan leba pou ganny delo ant 6er bomaten e 7er bomaten. Delo Morne Blanc ek Anse Louis dan leo pou koul depi 4er apremidi ziska 6er diswar.

Manmzel Philoe ti dir ki en eksper sorti Sid Afrik i ekspekte ariv dan pei sa semenn menm pour vin rektifye sa problenm elektronik kot stasyon desalinasyon Providence e enn fwa ki sa i ganny fer, zot ekspekte serten amelyorasyon dan restriksyon.

Antretan parey in leka tou le lannen, bann landrwa ki pou pli ganny afekte pou ganny delo trete atraver bann bowser. 

PUC in dir ki son bann travayer pou reste lo alert pour fer sir ki delo i ganny distribye dan bann landrwa ki pe pli ganny afekte.

PUC in osi demann manm piblik pour pa gaspiy delo e pour fer zefor pour enstal en tenk delo kot zot lakour pour anmas delo ler i koule.

Ziska prezan sitiasyon delo lo Praslin ek La Digue i ankor stab e napa restriksyon ki'n ganny enpoze lo sa de zil.