Lazournen Enternasyonal bann Ners-Minis Meriton i salye e onor bann ners model |12 May 2005

"Ozordi, (a lokazyon zot lazournen), mon salye zot e mon onor zot," Minis Meriton i dir dan son mesaz pour mark Lazournen Enternasyonal bann Ners.

Teks entegral Minis Meriton i lir konm swivan:
"A lokazyon lazournen bann ners mon felisit zot tou ki’n pran sa profesyon – ners!
"En vre ners, en ners model se en fanm oubyen en zonm ki’n swazir pour li donn swen de meyer kalite lezot dimoun pandan tou son lavi. 

I en swa konsyan ki sa zonm oubyen sa fanm in fer pour li tenir lanmen lezot dimoun e akonpanny zot.  Profesyon ners i pa zis en dyob.  I en vokasyon.  En ners i bezwen donn tou sa ki i kapab san ki i demann nanryen an retour.  En ners, alors, i pa en dimoun ordiner. 

I en serviter, i en konbatan, i en avoka, i en zanmi, i en frer, i en ser ki mazin lezot dimoun avan son lekor. I fer tou sa ki i kapab pour anmenn lazwa, diminyen soufrans dan sak endividi, dan sak fanmiy e dan sak kominote ki antour li.

"Ozordi mon fyer pour deklare ki nou sistenm lasante isi Seychelles in konn bokou sa bann ners, sa bann ners model.

Nou tou ki’n pas dan zot lanmen, nou fyer ki nou ti enn zot pasyan. Bokou pasyan zot konnen lekel sa bann ners model ki zot prezans dan koridor lopital ek klinik in fer sitan diferans dan lavi sitan dimoun. Ozordi mon salye zot e mon onor zot.

Si nou’n kapab fer sitan sikse dan domenn lasante isi Seychelles pandan sa dernyen 30 an, se zisteman akoz nou annan sa bann ners model ki donn tou, kor e am, pour nou lasante.

"Nou pa devret aret la, ozordi nou pe fer fas avek bokou plis defi, pour ranforsi nou langazman annou demann nou lekor serten kestyon. Eski tou nou ners i ankor pe met lanfaz lo menm degre devouman, lo menm degre sakrifis ki sa profesyon i demande?  Eski tou nou ners i met son pasyan premye e met son profesyon avan?  Eski tou nou ners an fen-d-kont, i en ners model?

"Mon mesaz pour tou bann ners alors se ki ozordi i en zour pour nou fer en refleksyon profon lo sa profesyon.  Annou amelyor li, annou donn tou pour nou pasyan.  Annou donn le meyer latansyon. 

Annou donn lemeyer de nou menm.  Annou fer tou sa ki nou kapab pour nou ranpli koridor nou lopital ek nou klinik avek bann vre ners, bann ners model, bann vre Florence Nightingale Seselwa.
"Bonn fet!"