Follow us on:

Facebook Twitter LinkedIn YouTube

Archive - Archive 2004 - July 2013

Mesaz Prezidan Larepiblik pour Lazournen Ners-'Kontinyen gard sa konfyans ki lepep i annan dan zot' |12 May 2005

Mesaz Prezidan Larepiblik pour Lazournen Ners-'Kontinyen gard sa konfyans ki lepep i annan dan zot'

Prezidan Michel

In osi azoute ki Gouvernman i oule ki 2005 e lannen ki pe vini i anmenn bokou sanzman dan servis lasante e dan travay tou ners.

Prezidan in dir sa dan son mesaz a lokazyon Lazournen Enternasyonal bann Ners Zedi 12 Me.
Teks entegral mesaz Prezidan i lir konm swivan:

"Depi komansman lannen nou pe donn priyorite servis lasante, ki vedir nou pe osi donn bokou plis latansyon travayer lasante e nou bann ners. E ozordi mon santi mwan fyer pour adres nou bann ners a lokazyon zot Lazournen.

"Tenm pour sa lannen, ki 'Ners pour sekirite pasyan', i en defi anprenan kont tou bann fleo lasante ki popilasyon lemonn pe fer fas avek konmela.

"Nou nasyon i rekonnet ki zot dedikasyon, devouman e lanmour i'n kontribye en kantite dan devlopman lasante piblik isi Seychelles.

"Nou bezwen apresye zot profesyonnalism ek zot devouman.
"Dan mon mesaz pour zot mon demande ki zot kontinyen gard sa respe ek konfyans ki piblik Seselwa i annan dan zot. Lazournen ners i osi en zour pour refleksyon lo zot bann lakonplisman, sikse e an partikilye zot bann defi.

"Mon demann tou ners ki'n dan sa profesyon pour en kantite lannen pour gide e partaz zot leksperyans avek bann ki fek zwenn servis lasante.

"Met akote enpe letan pour kontinyen zot devlopman profesyonnel ki tre enportan pour sa profesyon nob, pour ki zot a ogmant zot konpetans dan bann nouvo developman ki pe arive dan domenn lasante.

"Nou osi bezwen kontinyelman rod fason pour donn nou ners en pli bon lanvironnman travay, e nouvo zouti pour ed zot delivre en meyer servis lasante. Nou oule ki 2005 e lannen ki pe vini i anmenn bokou sanzman dan servis lasante e dan travay tou ners.

"Pour fini, mon ti a kontan demann zot pour ranforsi zot travay lekip. Bon kominikasyon i osi enportan dan travay lekip e pour ede redonn konfyans bann pasyan.

"I enportan fer resorti sa gran travay ki nou ners pe fer pour okip lasante nou zanfan sirtou pandan sa lannen 'Nou zanfan, nou trezor, nou lavenir'.   
 
"Mon swet tou ners bonn fet, bonn sans e sikse dan zot travay!
"Mersi pour zot swen ek soulazman ler nou malad. Nou priye ki Bondye i protez zot tou."

» Back to Archive