Lafet Lapannkot-Gran rasanbleman dyosezen Dimans |13 May 2005

Sa manifestasyon relizyez ki pou ganny animen anba tenm "Soufle Lespri Sen" pou deroul dan SMB Hall, Roche Caiman apartir 9er bomaten.

Dan en rankont avek lapres sa semenn, levek Legliz Katolik, Monsennyer Denis Wiehe, ansanm avek per Jonh Gappy ek lezot manm lo komite lorganizasyon, in lans en lapel ek manm piblik pour desann an gran nonm pour sa gran manifestasyon.

Monsennyer Wiehe ti dir ki lafet Lapannkot i sa moman kot bann kretyen i renouvle zot misyon ki Bondye in donn zot lo later.

I ti anonse ki nouvo sa lannen i prezans levek Pierre Sagna sorti Senegal. Levek Sagna, ki ti levek dyosez St Louis pandan 28 an, in pran son retret depi de-z-an pase e in deside pour vin pas en moman Seychelles.

Ler i ti pe koz lo progranm, Per Gappy ti fer resorti ki lazournen pou demar avek prezantasyon bann parwas ek mouvman, la kot i ti mansyonn partisipasyon bann fidel sorti Praslin ek La Digue osi.

I ti dir ki sa pou ganny swiv par gran lanmes solanel ki pou ganny selebre par Monsennyer Wiehe dan prezans lezot pret katolik.

En nouvo sanson avek tit "Soufle Lespri Sen" par Per John Gappy in osi ganny konpoze espesyalman pour sa zour.

An sa ki konsern dezennen pou annan lavant manze ek rafresisman dan bann stòl e apremidi pou ranpli avek animasyon tel ki mim, poenm e kantik par bann group sorti dan diferan parwas, ki pou osi war partisipasyon bann zanfan ek zenn.

Lazournen pou termin ver 3.30 apremidi avek benediksyon final.

Bann fidel ek manm piblik an zeneral i ganny demande pour aste liv lanmes ki anvant pour selman 10 roupi dan legliz zot parwas respektiv. I osi annan triko dedye pour sa zour anvant e sa i kout 35 roupi pour zanfan e 50 roupi pour adilt.