Café Romance, en avan gou 20enm Festival Kreol |14 May 2005

Pandan sa aktivite, bann prezan ti ganny sans ekout en varyete romans par diferan group zenn osi byen ki bann partisipan enpe pli aze e anmenmtan bwar kafe e degiste bann spesyalite kreol, tel koman nouga, gato kreol ek konfitir papay tournen.

Sa aktivite, ki'n ganny organize par divizyon gouvernman lokal an kolaborasyon avek bann  ladministrater distrik sid was Mahe, ti en avan gou bann aktivite ki pou ganny organize pour mark 20enm Festival Kreol an Oktob.

En manm organizater sa aktivite, Madanm Jessie Freminot, in dir ki Café Romance pou ganny swiv par lezot aktivite dan lezot distrik, ziska gran manifestasyon 20enm Festival Kreol pli tar sa lannen.

I ti fer remarke ki aktivite pour sa 20enm Festival Kreol in demar boner pour komans met lanbyans e donn manm piblik en avan gou, anvi ki progranm i byen sarze.

Ler i ti pe koz lo bann aktivite pour rezyon nor Mahe, Madanm Freminot ti mansyonn en sware moutya apele “Maloumbo” ki pou deroul kot sant kominoter Anse Etoile, Sanmdi le 28 Me apartir 6er aswar.