Lazournen Enternasyonal Lafanmiy-Kolok i diskit rol ek devwar en fanmiy |16 May 2005

Dan son diskour pour ofisyelman ouver kolok, ki ti deroul kot Lesntiti Kreol, Au Cap, sekreter prensipal dan Departman Servis Sosyal, Madanm Marie-Antoinette Alexis, ti fer resorti ki tenm ki'n ganny swazir pour komemor Lazournen Lafanmiy – "Fanmiy: Berso nou zanfan?" – i poz kestyon akoz "nou oule ki tou dimoun i reflesir e ariv lo en larepons".

Madanm Alexis ti fer resorti ki rol ek responsabilite bann adilt dan lavi fanmiy e dan lavi nou zanfan pe vin en size deplizanpli enportan isi Seychelles, tenan kont bann defi ki fanmiy pe fer fas avek dan sa 21enm syek.

"Prezidan Michel in souliny sa lenportans avek deklarasyon lannen 2005 koman en lannen spesyal pour nou zanfan," i ti azoute, an dizan ki se dan lafanmiy ki zanfan i ganny tou swen ki zot bezwen, pa zis materyel me osi spirityel pour viv e grandi pour zot vin bann adilt serye e responsab demen.

Pour terminen Madanm Alexis ti dir ki lafanmiy i sa berso ki sipoze protez nou zanfan, kontan zot, donn zot konfor, edik zot, gid zot e asir zot devlopman."

Kolok ti ganny fasilite par Madanm Marie-Pierre Llyod, ki en ansyen anplwayer departman sosyal e ki'n osi travay bokou ek bann fanmiy.

Bann partisipan sorti dan diferan sekter lasosyete ek lorganizasyon tel parey Alliance of Solidarity for the Family (ASFF), lasosiasyon bann papa ek lezot endividi, ti prezan pour partaz enpe zot leksperyans viv an fanmiy, debat lo kisisa vre rol en fanmiy, si maryaz i annan en rol pour zwe dan lavi en fanmiy, bon valer moral dan fanmiy, parmi lezot size ankor.

En kolok parey ti sipoze fer dan sant kominoter Baie Ste Anne Praslin Sanmdi.