Respekte popriyete piblik |24 May 2005

Sa lapel in vin apre ki manm piblik in komet bann akt vandalizm lo bann nouvo baraz ki’n ganny enstale otour Lenstiti Nasyonal pour Lasante ek Servis Sosyal (NIHSS).

Msye Joe Hoareau, direkter servis dan minister Lasante ek Servis Sosyal, ti eksplike ki "swivan konplent fer par bann etidyan ek travayer sa lekol konmkwa bann dimoun an deor i servi lakour NIHSS koman en semen piblik e osi fer akt vandalizm avek batiman sa lekol, nou ti deside enstal bann balistrad otour lekol."

Me Msye Hoareau ti dir ki malerezman i annan serten dimoun ki’n deside kas sa bann balistrad pour zot kapab kontinyen servi sa landrwa koman en semen pli pre pour ariv anvil.

Sa proze konstriksyon balistrad otour lekol NIHSS, ki ti komanse Desanm lannen pase e ki ti ekspekte teminen an Fevriye sa lannen, in kout 187,000 roupi.

Msye Hoareau ti dir ki akoz vandalizm, proze in retarde e son minister in bezwen depans ankor 8,000 roupi pour repar domaz.

Antretan, Msye Hoareau in dir ki ansanm avek kontrakter ki pe fer sa travay, Minister Lasante ek Servis Sosyal pe rod fason pour ranforsi sa bann balistrad afen ki i ava fer li pli difisil pour dimoun kase.

"En semen piblik in ganny fer pour zot servi. Alors mon pe demann manm piblik pour servi sa semen e aret servi sa lakour lekol koman en short cut," Msye Hoareau ti azoute.