Miting piblik dan distrik Cascade-Priorite gouvernman se pou donn travay zenn, Prezidan i dir |27 May 2005

Prezidan Michel ti fer sa lanons pandan en miting piblik ki i ti fer Merkredi avek bann zabitan distrik Cascade. Vis-prezidan Joseph Belmont to osi prezan.

Sa miting, ki ti asiste par en gran lafoul dimoun ki ti’n ranpli Sant Kominoter sa distrik, ti premye dan en seri rankont ki Prezidan Michel i annan lentansyon fer avek zabitan tou distrik dan pei. Bi sa bann rankont se pour etabli dyalog e konsiltasyon ant popilasyon e gouvernman.

Ler i ti adres bann dimoun, Prezidan Michel ti fer resorti ki atraver sa bann konsiltasyon i anvi donn lepep sans eksprim zot santiman e lanvi pour zot partisip plis dan devlopman pei.

"I enportan ekoute ki lepep i annan pou dir," i ti dir, an azoutan ki i la pour travay pour fer plezir lepep, e sa ki zot eksprimen i a ed li met an plas bann mezir neseser pour fer pei marse.
"Mon ere vwar ki zot in vin nonbre. Sa i montre ki zot annan en gran lentere dan progre zot pei e zot enterese pour ed mwan fer li marse," Prezidan Michel ti dir.

Pandan sa rankont, bann zabitan ti met devan plizyer problenm ki zot ti dir zot pe fer fas avek dan zot lavi personnel, o nivo distrik e o nivo nasyonal.

Konsern bann zabitan ti dan plizyer domenn parey lo kote sosyal, lozman, akse avek lón, kondisyon travay e lanplwa pour bann zenn, sitiasyon lekonomi, kominikasyon avek biro Prezidan, viktimizasyon, mank lalimyer e akse semen dan serten landrwa dan distrik e plizyer lezot ankor.

Ler i ti pe reponn kestyon lo size mank lanplwa pour bann zenn, Prezidan ti dir ki pandan sa bann dernyen lannen, gouvernman in fer bokou pour reponn a laspirasyon lazenes e ki i pe kontinyen rod fason pour ki tou zenn i ganny en lanplwa konvenab. Par egzanp, i ti dir, ki o nivo lendistri tourizm, pandan bann lannen ki pe vini plizyer proze pe al ganny fer e plis lanplwa pe al ganny kree.

Sepandan, Prezidan Michel ti dir ki fodre pa ki zenn i kontinyen avek sa mantalite kot malgre i annan louvraz ki zot kapab fer, zot tant pour swazir travay. Par egzanp, i ti azoute, i annan plas 'waitress' dan plizyer lotel me zenn pa vwar sa louvraz favorab akoz zot pa kontan travay aswar.

"Aprann aksepte travay ki annan," Prezidan ti dir.
 I ti osi dir ki gouvernman pe al fer serten restriktirasyon dan progranm 'Unemployment Relief Scheme' (URS) pour plas bann zenn ki’n lo sa progranm dan lanplwa.

Revizyon pour osi ganny fer dan lezot 'scheme'  sosyal avek bi dekouraz labi e pour ki bann dimoun ki vreman bezwen lasistans i gannyen o pli vit posib.

Prezidan Michel ti dir ki i okouran serten ka kot par egzanp dimoun in fer laplikasyon pour serten lasistans ki zot ti byen bezwen e zot in ganny letan mor e zot pan’n gannyen.

Avek restriktirasyon, sistenm lasistans sosyal ava vin pli efikas e fodre pa ki bann ka parey i repet ankor, i ti dir.

Ti annan plizyer konplent ki ti leve kot i konsern kominikasyon avek biro Prezidan kot bann dimoun ti dir ki laplipar ditan zot ekrir let pou eksplik Prezidan zot problenm apre zot ganny refer avek en lot dimoun e tou i fini koumsanmenm.

Prezidan Michel ti dir ki vi ki i resevwar 50 a 75 let par zour i pa posib pour li vwar tou sa dimoun e alor i refer zot avek lezot zosfisye ki zot responsabilite se pou kominik avek sa bann dimoun.

Prezidan ti dir ki i rankontre en trantenn dimoun par semenn. I ti fer resorti ki gouvernman pe al akseler son progranm pour amelyor 'service delivery' dan plizyer departman dan gouvernman. I ti dir ki ler en dimoun in ekri en let i merit o mwen ganny en larepons konmkwa ki son let in ganny resevwar.

Kot i konsern lakaz, Prezidan ti dir ki gouvernman pou kontinyen konstrir lakaz pour ki sak fanmiy i ganny en twa lo zot latet e pour sa i ti dir pei pou bezwen kontinyen pran lón.

Plizyer dimoun ti osi demann Prezidan pour vin vizit departman kot zot travay kot zot ti dir i annan plizyer problenm.

Prezidan Michel ti reponn zot an dizan ki pour le moman i pe konsantre avek Minister Lasante akoz i annan en kantite problenm dan sa sekter, me i annan plan pour vizit plizyer lezot sekter dan pei plitar.

Dan son ladres final, Prezidan Michel ti dir ki in kontan pour ekout bann dimoun ki’n koze e in ganny en pli bon konprenezon bann problenm ki zot pe fer fas avek. I ti dir ki i senpatiz avek bann ki pe pas dan serten soufrans e dir ki malgre ki gouvernman pa pou kapab fer tou en sel kou, i pou esey fer son mye pour amelyor zot sitiasyon.

In lans en lapel avek bann zabitan Cascade pour gard sa linite antre zot e sa bon kominikasyon pour zot vwar ki mannyer zot pour rezourd serten problenm o nivo distrik.

Prosen rankont pou deroul dan distrik Anse Etoile dan Sant Kominoter ozordi. Lasal pou ouver 4.30 e zabitan sa distrik i ganny demande pou ariv boner pou ki miting i komans zis 5 er.