Lasosiasyon trwazyenm az i dedye seminar pour byennet bann zanfan |28 May 2005
Sa seminar, ki pe deroul anba tenm "Trwazyenm az koman lazans sipor pour nou zanfan, nou trezor, nou lavenir" i katriyenm seminar rezidansyel ki ganny organize par departman Gouvernman Lokal dan Minister Gouverman Lokal, Spor ek Kiltir, an kolaborasyon avek Lasosiasyon Trwazyenm Az.
Ler i ti adres bann manm dan prezans Minis pour Gouvernman Lokal, Spor ek Kiltir, Madanm Sylvette Pool, ek Sekreter Prensipal pour Gouvernman Lokal Msye Olsen Vidot, Msye Dan Frichot, Direkter Zeneral Devlopman Kominoter, ti fer resorti ki tenm ki sa lasosiasyon in swazir pour sa seminar i demontre sa lanmour profon ki zot annan pour nou zanfan, pour lazenes e pour pei an zeneral.
I ti dir ki bann dimoun aze i ranpli avek leksperyans, sazes ek bann bon valer moral ki zot kapab partaz ek bann zenn.
Dapre Doyace Porice, zofisye devlopman progranm pour bann trwazyenm az, bann partisipan pou ganny sans diskit lo meyer fason pour apros bann zenn e partaz zot lide e fason viv.
Seminar, ki pou termin ozordi apremidi, pou osi ganny kordinen par bann zofisye sorti dan Minister Lasante ek Servis Sosyal, Minister Ledikasyon ek Lazenes e osi zofisye Konsey Nasyonal pour Zanfan (NCC).
Pandan sa kanpman kot Vilaz Lazenes Cap Ternay, bann manm group trwazyenm az pou osi ganny sans fer lesanz e demen zot ekspekte rankontre bann zanfan sorti dan diferan distrik lo Mahe e partisip dan divers aktivite.