Miting piblik dan distrk Anse Etoile-Zefor pou ganny fer pour ki materyo konstriksyon pa manke, Prezidan i dir |30 May 2005

I ti dir sa Vandredi pandan dezyenm miting piblik ki i ti fer avek bann zabitan distrik Anse Etoile. Premye miting ti fer Cascade Merkredi pase.

Prezidan Michel, ki ti akonpannyen par Vis Prezidan Joseph Belmont pandan dezyenm dan sa seri konsiltasyon ki gouvernman in komanse, ti dir ki tre byento en nouvo mekanizm pou ouver pour fer ki dan lavenir i toultan annan materyo konstriksyon dan pei.

Prezidan Michel ti dir ki sa problenm mank materyo konstriksyon i enn son konsern prensipal e i ti eksplike ki sa i an rezilta mankman deviz etranzer dan pei .

Parmi lezot problenm sosyal e ekonomik ki bann zabitan Anse Etoile ti koz bokou lo la se problenm lakaz.

Letan i ti pe reponn zot kestyon lo size lakaz, Prezidan Michel ti fer rapel ki polisi gouvernman se pour fer sir ki sak fanmiy Seselwa i ganny en twa lo son latet, an azoutan ki "me nou pa pou kapab fer sa en sel kou".

Prezidan Michel ti dir ki de milye e de milye lakaz in ganny konstrir dan Seychelles kot plizyer fanmiy Seselwa in benefisye me i ti dir ki i annan ankor bokou pour fer.

Malgre bann problenm deviz etranzer Prezidan Michel in donn son langazman ki son gouvernman pou fer sir ki dan lefitir tou fanmiy Seselwa ki bezwen en lakaz a gannyen.

Demann pour semen, problenm drog ek lalkol, inefikasite dan serten servis piblik, o standar lavi ti lezot pwen for sa rankont dan dsitrik Anse Etoile.

Prezidan Michel ti osi donn leksplikasyon detaye lo akoz ki i annan pri serten komodite ki'n monte malgre zefor gouvernman pour fer pri lavi desann. I ti dir ki sa in arive akoz ki serten pei parey Sid Afrik kot Seychelles i enport laplipar marsandiz, son valer larzan in double. Alor sa i fer ki pri sa bann marsandiz osi in double. En lot fakter ki Prezidan Michel in dir in fer pri serten komodite monte se logmantasyon dan pri petrol.

Apre ki i ti'in ekout plizyer kontribisyon e lopinyon sorti kot bann partisipan, Prezidan Michel ti repete ki i krwar bokou dan konsiltasyon, dyalog ek lesanz lide akoz se atraver sa ki gouvernman i kapab ganny en pli bon nide "pour ki ansanm nou a kapab fer nou travay pli byen."
Prezidan Michel ti dir ki in fer plizyer rankont avek bann diferan akter lekonomi kot in ganny nide koman pour met anplas bann reform sosyal ek ekonomik pour fer nou pei avanse e fer li devlop plis e la in ariv ler pour "zwenn avek bann dimoun dan distrik pour vwar ki zot problenm, ki zot laspirasyon pour nou kapab ganny zot lide e travay pli byen pour zot."

Prezidan Michel ti dir ki en lot rezon tre enportan pour fer sa seri rankont dan distrik se ki plizyer fwa dan lezot pei bann gouvernman i bliye ki mannyer dimoun pe viv dan kominote e ki souvann fwa gouvernman i get tro bokou keksoz lo nivo zeneral e nasyonal.

"Me malgre nou bezwen get keksoz lo nivo nasyonal, i enportan osi ki nou get keksoz lo nivo kominote e vwar kwa ki zot bezwen pour ki gouvernman i fer zot lavi pli fasil.

Sa ki pli enportan se ki zot bann dezir ek swe i ganny akonplir," i ti dir.

Prosen rankont pou fer dan distrik Bel Ombre Lendii. Miniting pou fer dan sant kominoter e lasal pou ouver apartir 4er30.

Sa pou swiv Mardi avek miting pou distrik Roche Caïman ki pou fer dan SMB Exhibition Hall. Sa semenn pou annan en lot miting ki pou fer dan sant kominoter Takamaka Vandredi.