Follow us on:

Facebook Twitter LinkedIn YouTube

Archive - Archive 2004 - July 2013

Lazournen Zanfan-Prezidan i renouvle son langazman anver lepanouisman zanfan |01 June 2005

 

Prezidan in dir sa dan son mesaz a lokazyon Lazournen Zanfan Merkredi le 1 Zen.

Mesaz Prezidan i lir konm swivan:
 “Ozordi i en zour lazwa pour nou zanfan. I en zour pour nou sosyete selebre nou lakonplisman ek travay ki nou kontinyen fer pour pran ka avek zanfan Seselwa e elve e edik zot byen.              

“Seychelles pe selebre Lazournen Zanfan depi 1979,  kan Nasyon Zini ti deklar Lannen Enternasyonal Zanfan. Napa okenn dout ki nou pei, son gouvernman ek lasosyete Seselwa, in fer bokou pour amelyor sitiasyon zanfan depi sa letan.

“Nou polisi ek progranm dan lasante, ledikasyon, lozman, sport ek kiltir ensi ki lezot progranm, i’n fer ki lavi en zanfan Seselwa i enkonparableman meyer ki dan lepase e osi ki dan plizyer pei.

“Bann legliz ek lezot lorganizasyon in osi, e pe kontinyen, fer bokou pour zanfan ek lafanmiy. 
“Me malgre nou sikse i annan nouvo problenm;  i annan ankor travay pour nou fer konman en sosyete pour asir proteksyon zanfan Seselwa ek son devlopman.

“Nou’n deklar 2005 lannen “Nou Zanfan, Nou Trezor, Nou Lavenir” pour nou donn nou zanfan plis latansyon ankor.  

“Nou annan pour diminyen e elimin plizyer kalite labi ek presyon ki nou zanfan i sibir - labi fizik, seksyel, mantal; labi drog ek lalkol par zanfan zot menm oswa par paran; presyon en stil lavi tro materyel; presyon tay ek lavi olye pran letan pour grandi e benefisye letan lanfans.  

“Nou bezwen touzour met lespri ek zefor ansanm, met diferans dekote, pour atak sa bann problenm. Tou dimoun i annan en kontribisyon pour fer pour adres sa bann problenm lasosyete.

“E sak paran i annan en rol kle pour fer sir ki i donn son zanfan en bon konmansman dan lavi e ki son zanfan i kontinyen lo bon semen. Lezot dimoun, lezot striktir i kapab ede e donn sipor, me se paran ek lafanmiy ki annan sa rol prensipal ek sa

privilez pour elve zanfan. Se paran ek lafanmiy ki plis ki lezot i santi lafyerte ler en zanfan, oswa en zenn, i briye dan sa ki i fer ou sa ki i devenir.     

“Sakenn nou zanfan i presye. Annou elve li byen, edik li byen, gid li e ankouraz li pour li  epanoui e realiz tou son potansyel. Nou zanfan se nou lavenir e lakalite lavi dan nou pei pour depann lo zot e lo kalite dimoun ki zot ete.

“Nou sosyete i annan bokou rezon pour rezouir pour sa ki i fer konsernan nou zanfan. “Dan sa lannen kot nou pe met lanfaz lo nou zanfan, annou renouvle nou langazman pour nou travay pour kontiny sa ki byen, e diminye sa ki pa byen, pour pli bon proteksyon e pli bon lepanouisman nou zanfan. E pour ki ansanm avek bann zanfan ki pe grandi, nou a kree en Seychelles ankor meyer. 

“Mon pran sa lokazyon pour remersye tou dimoun ek tou lorganizasyon ki pe travay pour e avek zanfan.

“Mon salye tou paran partou dan nou pei e ankouraz zot dan zot misyon nob pour elve sa don presye, sa trezor, ki zot annan e ki osi lafyerte nou pei.

“Pour bann zanfan, mon demann zot pour swiv bon konsey zot paran e lezot adilt. Malgre difikilte ki zot kapab rankontre, fer sir ki zot grandi byen pour zot realiz zot rev e pran zot plas dan lasosyete. 
  
"Bonn fet e ki Bon Dye i beni zot."

Caption
Prizidan Michel

» Back to Archive