Eleksyon Prezidansyel 2006-SPPF i ofisyelman lans son kanpanny |07 July 2006

Pandan sa rasanbleman, ki ti asiste par fondater e prezidan sa parti, msye France Albert Rene, Vis-Prezidan Joseph Belmont, ki osi kandida vis-prezidansyel SPPF pour eleksyon,  manm Komite Santral, manm Lazenes sa parti ek lezot siporter, Prezidan Michel ti devwal son mesaz kanpanny pour prosen eleksyon – En leker pour tou Seselwa – ki baze lo prensip fondamantal parti SPPF, savedir ki tou zanfan, fanm ek zonm i reste touzour o sant devlopman pei.

Avan ki Prezidan Michel ti pran laparol, en reprezantan parti ti eksplike ki atraver sa mesaz, "Prezidan Michel ansanm avek Vis-Prezidan Belmont i al pli lwen ki sa, e dir ki en vot pour Jj i en langazman personnel dan en zonm ki meyer pour diriz sa pei."

I ti azoute ki En leker pour tou Seselwa i langazman personnel Prezidan Michel anver sak sitwayen  e, avek Seselwa aker, se en siny lanmour, latasman personnel ek lanmitye ki i partaze avek sak zanfan, zonm ek fanm ki ne e viv dan Seychelles.

Letan i ti pran laparol, Prezidan Michel ti dir ki i prezant li avek tou bann prezan koman prosen kandida Prezidansyel “pour akonplir sa nouvo misyon pour Seychelles e pour pep Seselwa”.
Prezidan Michel ti dir ki i fyer ki parti SPPF in konfye li ek Vis-Prezidan Belmont sa responsabilite pour defann e promouvwar prensip parti.

“Avek sa leksperyans ki nou’n gannyen e sa lanmour ki nou annan pour Seychelles e pep Seselwa, nou determinen plis ki zanmen pour diriz nasyon Seselwa ver plis progre ek prosperite e ver en lavenir pli briyan ankor,” Prezidan Michel ti dir.

I ti dir ki en Seychelles kot i annan linite, stabilite, laliberte, menm sans pour tou dimoun e en meyer kalite lavi, se sa son langazman ek garanti.

Prezidan Michel ti osi dir ki Seychelles i bezwen en Prezidan ki kwar dan donn tou Seselwa menm loportinite, ki kwar e partaz laspirasyon son pep, ki annan en plan ki santre lo en meyer kalite pour son pep e ki Seychelles i bezwen en Prezidan pour eksel Seychelles.

“Moman pe aprose. Mon konfyan. Le 30 Zilyet mon envit tou Seslewa pour partaz sa plan ki mon annan pour Seychelles ek pep Seselwa. Enn ki permet nou kontiny sa travay ki nou’n deza komanse ansanm. En plan ki batir lo mon vizyon pour en meyer kalite lavi pour tou Seselwa. En plan ki tou Seselwa i annan en par ladan,” Prezidan Michel ti dir.

I ti dir ki ansanm avek tou Seselwa, gouvernman SPPF pou ekrir en lot sapit dan son listwar, listwar en pep lib e fyer, en pep determinen, pare pour anmenn Seychelles lo sa nouvo letap son devlopman.

“Tanto mon renouvle mon langazman avek zot, avek tou Seselwa pour kontinyen donn tou mon kouraz pour sa Seychelles, nou patri ki nou kontan, e sa pep ki sitan pros avek mon leker,” Prezidan Michel ti dir.

Sa rasanbleman ti osi marke par plizyer performans mizikal par diferan artis.