Kominike Lapolis-5-an prizon pour kas batiman, antre e vole |22 October 2008
Lakour in ordonnen ki son 2 term prizon i mars ansanm ki vedir i pou fer selman en term 5-an prizon.
Victor ti komet sa lofans an Zen 2006 letan i ti kase, antre e vole dan en laboutik anvil.
8 mwan prizon pour vol
En zenn-onm 20-an, Dean Dufrene sorti St Louis, in kondann 8 mwan prizon pour vol. Lensidan ti ariv le 19 Oktob letan i ti antre dan en warehouse IOT e vol serten kantite kartron bwat ton.
Dufrene ti ganny arete menm zour e swivan lanket lapolis in rekiper tou sa bann bwat ton ki ti’n ganny vole.
En zenn-onm i ganny sarze pour vol
En zenn-onm 18-an sorti Val D’Andorre, Baie Lazare in ofisyelman ganny sarze pour lofans vol.
Apre ki i ti’n ganny sarze, sa zenn-onm ti pled koupab pour vol pers en madanm La Louise Vandredi pase.
Sa akize in ganny large lo serten kondisyon pour li retourn ankour Vandredi.
I ti ganny arete menm zour ki i ti komet sa lofans e swivan lanket lapolis in reisi rekiper pers sa viktim ki ti annan larzan ladan.
En zonm pe rimann an koneksyon avek en ka vol
En zonm 34-an sorti Riviere Anglaise ti pas ankour Lendi e ganny rimann an koneksyon avek en ka vol ki ti arive dan en bizoutri dan lavil Victoria Merkredi pase.
Sa sispe, ki pou repas ankour ozordi, ti ganny arete Vandredi tar apremidi.
De zonm i ganny sarze pour trafik drog
De zonm in ganny sarze pour lofans trafik drog ilegal.
Premye i sa zonm 27-an sorti Mont Buxton ki ti ganny arete semenn pase Les Mamelles an posesyon serten kantite eroin.
Dezyenm i sa zonm 24-an sorti Anse Etoile ki ti ganny arete dan tol Plaisance Vandredi le 10 Oktob an posesyon eroin li osi.
Tou le de akize in ganny rimann prizon Montagne Posée e zot pou repas ankour le 3 Novanm.
De zonm i ganny sarze pour vol
En zonm 24-an ek en lot 34-an in ganny sarze pour kase e antre dan en Take-Away Les Mamelles e vol serten sonm larzan.
Sa ti ariv pandan lannwit le 7 Oktob.
Swivan lanket anmennen par lapolis dan sa zafer, enpe sa bann larzan vole in ganny rekipere.