Kwen Profil-En fermye popiler dan bazar |07 November 2008

I dekri sa later laba koman en landrwa tre fertil pour plante.

Msye Valentin, ki en zabitan Rochon, i aze 47-an e papa trwa zanfan.
Sa msye i pratik selman organic farming, savedir i pa servi okenn prodwi simik dan son zarden.

Fodre dir ki bann legim ek fri ki i prodwi i tre varye e atiran.

Lo display sa zour 8er edmi bomaten dan larantre nouvo bazar, kote drwat vye bazar Selwyn Selwyn Clark, ou ti a kapab war depi bigarad, frisiter, mang sab, mang draze, bannann msye ek zannannan.

Koman legim ek gro manze, Msye Valentin ti pe vann zironmon, kokonm, patat blan, patat rouz, kanbar ek mayok. En varyete pwason sale osi ti anvant sa zour.

Dan en pti kwen spesyal pour bann zepis ek lefizyon, sa zour ti annan detrwa pti plant pour dekorasyon tel koman fler lay (en plant ki resanble en pe plan dipwav) ki ti’ n osi ganny enstale.

Sa ki enterasan se ki letan ou frot ou lanmen lo son fey, sa zoli loder lay i reste.
Msye Valentin i dir sa plant i senpleman pour dekor lakour. Petet i osi annan lezot verti ki pa ankor ganny devwale!

En pti resers nou mazinen a devwal bokou sekre.
Osi dan sa pti kwen, ou ti kapab vwar en bon douzenn plan lanmant gro fey ek bazilik.

En lot plant ki resanble sandel, ki Msye Valentin i apel origano, ti osi lo display. I ti dir ki son fler i resanble antiyonm blan.

Msye Valentin i paret tre renonmen dan bazar. En bon nonm kliyan ti’n deza antour son latab pandan ki nou ti pe koze.

Nou ti reisi dekouver en zoli pti kapatya dan kwen bann plan zepis. Msye Valentin i fer nou konpran ki i en bon fezer kapatya e ki detanzaot bann zanfan lekol i vizit li dan bazar pour resers lo enn de pratik tradisyonnel.

“En group zanfan STA i’ n fek pas kot mwan sa semenn,” i ti dir. 
“Zot ti pe fer resers lo kapatya. Zot i’n demann mwan pour montre zot ki mannyer i tres kapatya.”

Koman konsey, Msye Valentin i demann tou Seselwa pour pa per pour atrap zot pyos.
“Si ou annan en pti morso later kot ou, pa per pour tap de pti kou-d-pyos e plant en pti prodwi ou osi,” i ti dir.

I ti fer remarke ki deza dan son pti zarden, i annan en bon pe fri telki serimolya, bigarad ek karanbol.

Ler nou ti demann li si i vann byen bann tel fri rar, i ti reponn : “me byensir, koman mon met lo bazar, i fini”.