Zabitan Takamaka i ganny en nouvo sant kominoter


20-April-2009

Prezidan Michel i devwal plak pour inogir nouvo sant kominoter Takamaka

Sa sant, ki’n konstri zis par anba nouvo lekol primer sa distrik, ti ouver par Prezidan James Michel, ki ti osi envite-d-oner kot sa seremoni.

Sa louvertir ti osi asiste par plizyer minis, o zofisye dan gouvernman, bann ansyen administrater ek manm lasanble, osi byen ki manm lotorite, partener ek zabitan sa distrik.

Apre ki sa batiman ti’n resevwar benediksyon Bon Dye par Reveran Daniel Calais sorti Legliz Prezidan Michel i plant en pye Bwa Bannann dan lakour sa nouvo santAnglikan, Prezidan Michel ti devwal plak ki ti mark louvertir sa nouvo sant kominoter.

Answit Msye Michel ti plant en pye Bwa Bannann dan lakour sa batiman an siny langazman sa distrik anver proteksyon lanvironnman. 

Apre sa Msye Michel ti ganny akonpannyen lo en vizit sa sant ki’n konstri dan en landrwa tre apik e parmi en kantite ros.
Sa sant, ki en batiman modern avek en larsitektir inik pour sa landrwa, i osi enkli tou bann fasilite modern pour konfor bann zabitan.

I osi annan dekwa lespas enkli plizyer lasal ki pou permet bann zabitan fer tou zot bann aktivite rekreasyonnel ek lwazir.
Louvertir sa batiman ti koensid avek zournen portouvert sa distrik e bann zabitan ti’n mont en legzibisyon ki demontre tou bann travay ki sak group ek mouvman dan sa kominote in fer pandan sa dernyen lannen.

Msye Michel ti ganny sans pour apresye sa bann travay e osi koz avek bann dimoun.
Travay pour konstrir sa sant ti komanse an 2006 e in ganny antreprann par lakonpannyen Sahajanand Builders.

Me sa travay ti retarde pour plizyer rezon e parmi i lefe ki sa teren ti ranpli avek ros ki bann zabitan in kase zot menm atraver zot travay volonter, en travay ki’n ganny felisite par Minis Minis Meritonpour Devlopman Kominoter, Lazenes, Spor ek Kiltir Msye Vincent Meriton ek Ladministrater sa distrik, Madanm Rosita Hibonne.

Letan i ti adres bann envite avan louvertir sa nouvo batiman, Minis Meriton ti dir ki konstriksyon sa sant ki’n fer avek partisipasyon aktiv sa kominote, “pou konsolid sa prosesis gouvernans lokal  ki Departman Devlopman Kominoter pe kontinyelman promouvwar e sa lannen anba tenm ‘Angaze anver devlopman lokal e emansipasyon lakominote’”.

Minis Meriton ti fer rapel ki dan son diskour lo Leta Lanasyon, Msye Michel ti dir “nou anvi bann kominote ki annan vre pouvwar pour fer ladiferans” e a sa pwen Msye Meriton ti koz lo bann diferan aktivite lekip distrik ki responsab pour diferan laspe devlopman dan kominote.

Msye Meriton ti ankor en fwa fer rapel ki i devwar ek responsabilite tou dirizan ki swa lo nivo kominote ouswa lo nivo nasyonal pour koste e angaz zot pour permet plis devlopman dinamik e sinifikatif dan bann distrik.

Msye Meriton ti asir zabitan Takamaka ki louvertir sa sant i ankor en fwa montre laprev langazman nou dirizan pour devlopman kominoter e son determinasyon pour reste pli pros e a lekout son pep.

Lo son kote Madanm Hibonne ti remersye gouverman pour rekonnet bezwen sa distrik pour en fasilite pli konvenab pour lepanouisman son bann manm.

Nouvo sant kominoter Takamaka i annan en larsitektir inik pour sa landrwa

I ti osi remersye bann zabitan ki atraver zot travay volonter zot in transform sa landrwa e i ti lans lapel avek tou zabitan Takamaka pour kontinyen reste ini dan tou sa ki zot fer.

“Akoz sa sant i en legzanp vivan ki bokou i kapab ganny fer ler en kominote i inifye son zefor e met lanmour dan sa ki i fer,” Madanm Hibonne ti dir.

Send your comment :

Name *

Email *

Comment *