Miting konsiltativ dan distrik Grand Anse Praslin-Pri marsandiz, kou konstriksyon ek pasaz avyon domestik i domin rankont


27-April-2009

An sa ki konsern pri marsandiz, Prezidan ti dir ki napa rezon akoz marsan pa kapab fer desann enpe zot pri vi ki ozordi deviz i kout bokou pli mwens ki ler reform ekonomik ti’n fek komanse.

Prezidan Michel ti fer remarke ki si sa bann marsan i fer zot biznes byen e dan en fason onnet, zot a kapab fer pri marsandiz vin pli konpetitiv.

Prezidan Michel ek lezot dirizan pandan miting Grand Anse Praslin Sanmdi

Lo kote pri materyo ek kou konstriksyon ki bokou pli ser pour dimoun Praslin ek La Digue, Minis pour Devlopman Nasyonal Jacquelin Dugasse ti enform bann zabitan Grand Anse ki son minister pe fer bokou travay avek Minister Finans lo sa bann size e piblik pou ganny detay lo bann desizyon ler bann travay ava fini.

Plizyer konsern ti osi leve lo size pri tiket avyon pour bann vol domestik. Konsern ti sirtou pour dimoun ki bezwen vin vwar dokter Mahe e bann ki bezwen akonpanny en paran ou zanfan. Bann zabitan i dir ki pri karbiran pe kontinyen desann me konsonmater pa pe zouir bann benefis ki sa i anmennen.

Prezidan ti dir bann zabitan ki in deza fini demann Air Seychelles pour etidye sa sityasyon.

Bann lezot pwen enportan ki zabitan sa distrik pa ti manke pour fer resorti ti konsern lekonomi, sirtou an relasyon avek det ki pei i annan e son kapasite pour repeye.

Konsern lo nivo ledikasyon i ki Praslin i ganny neglize e ti annan swe ki minis i vizit bann lekol lo sa zil. La Minis pour Ledikasyon Bernard Shamlaye ti donn son langazman pour fer sa pandan 2enm trimes.

Touzour an relasyon avek ledikasyon, ti osi annan konsern lo size bann zenn Praslin ki reste dan hostel Mahe, nesesite pour revwar zot allowance e kou pour zot vizit zot paran.

Bann zabitan ti osi demann plis leksplikasyon lo bann progranm lanplwa pour bann zenn Praslin.

Minis pour Lanplwa ek Devlopman Resours Imen Macsuzy Mondon ti donn detay lo tou bann progranm ki an plas e i ti enform bann zabitan ki son minister pe organiz en lafwar rekritman ki pou deroul pandan mwan Me. I ti osi demann tou bann dimoun ki pa travay, sirtou bann zenn, pour al anrezistre pour en lanplwa.

Ti osi annan demann pour minister responsab pour spor pou revwar finansman ki i donn bann zenn sirtou bann ki reste Praslin.

Apre ki i ti’n eksplik sa size, Minis Vincent Meriton ti osi donn detay bann diferan  progranm aktivite pour zenn  ki son minister i annan an plas pour reponn bezwen bann zenn.

Lo kote lenfrastriktir spor, ti annan kestyon lo ki pe arive avek konpleks spor dan sa distrik. Msye Meriton ti admet ki in annan serten difikilte pour konplet sa proze e la avek progranm reform, gouvernman in revwar son priorite an sa ki konsern bann proze e sa fasilite pou ganny ankor retar.

Me minis ti dir ki malgre tousala, son minister ansanm avek Minister Finans in kapab ganny serten finansman pour proze Astroturf e ki sa i ekspekte konplete ver Septanm sa lannen.

Ti osi annan en demann pour met anplas lo Praslin tou fasilite neseser pour montre dray, sa avek bi pour koup depans asosye avek sa aktivite.

En zenn i met devan son konsern pandan miting Grand Anse Praslin Sanmdi

Bann fermye Amitie ti osi met zot konsern devan e sa ti lo pri ek kalite langre ki zot dir pa donn gran rannman menm si i pli ser. Pri bann lagrenn e osi mank varyete i osi en konsern.

Lentere lo lón pour bann fermye, nesesite ki STC i annan en pli gran fasilite pour stok plis prodwi parey manze zannimo, ti osi ganny souleve.

Minis responsab pour Resours Natirel Joel Morgan ti donn serten leksplikasyon e promet pour diskit tousala avek bann teknisyen son minister.

Prezidan lo son kote ti salye bann fermye pour zot travay dir menm dan bann kondisyon ase difisil e asir zot ki gouvernman pou kontinyen donn zot tou sipor neseser.

Swivan sa rankont Grand Anse Prezidan ek son lantouraz ti diriz Baie Ste Anne pour en lot miting konsiltativ avek zabitan sa distrik. Nou pou retourn lo en rapor detaye sa rankont Baie Ste Anne dan nou prosen nimero.

Send your comment :

Name *

Email *

Comment *