Miting konsiltativ Baie Ste Anne Praslin-Zabitan i demann plis konsiltasyon, lasirans pour fermye e en servis labatwar |28 April 2009

Manm elekte pour sa distrik Mitcy Larue ti osi demande ki Baie Ste Anne i ganny plis lotonomi pour zer son prop zafer pour ki problenm distrik i ganny rezourd pli vit e pa esper desizyon sorti  santral ki pran tro bokou letan.

Lo size plis konsiltasyon Madanm Larue ti donn plizyer legzanp kot distrik pa’n ganny konsilte lo bann desizyon e bann size ki konsern li.

Ler i ti pran laparol Prezidan James Michel ti admet ki sa i vre e asir Madanm Larue ki son bann pwen in byen ganny note e ava ganny konsidere pour lavenir.

Lo kote lasirans pour fermye minis responsab pour Resours Natirel Joel Morgan ti dir ki son minister pe finaliz sa avek lasistans FAO e ki byento sa pou ganny met devan gouvernman. A sa pwen Msye Morgan ti demann fermye pour annan enpe plis pasyans.

An sa ki konsern servis labatwar Msye Morgan ti eksplik bann problenm ki’n leve lo sa size ki fer ki napa en tel servis lo Praslin.

I ti fer remarke ki son minister i an kontak avek nouvo propriyeter sa fasilite pou vwar posibilite reabilit sa labatwar pour kapab donn en tel servis sa zil.

I ti osi dir ki demars pe ganny fer pour vwar si korperativ fermye pa kapab fer marse sa servis. Msye Morgan ti asir bann fermye ki son minister i espere trouv en solisyon pour sa problenm tre byento.

En lot pwen ki ti leve ti konsern later pour bann pti biznes dan sa distrik e la minis responsab pour Devlopman Nasyonal Jacquelin Dugasse ti enform bann zabitan ki gouvernman pe depans 4 milyon roupi sa lannen pour devlopman lo Zil Eve. Sa i dan lenfrastriktir, sirtou semen.

I ti dir ki osito ki sa i fini pare gouvernman pou dan en pozisyon pour donn plizyer kare later pour bann pti biznes demar zot konstriksyon. Sa i ekspekte ver Out oubyen Septanm sa lannen.

Lezot pwen ki bann zabitan ti fer resorti ti enkli ankor pri materyo ek kou konstriksyon, pri marsandiz, servis dan bann minister ki tro dousman, mank konfidansyalite dan servis lasante sa distrik, nesesite pour revwar servis lazans byennet sosyal, nesesite pour revwar ka par ka demann pour servis swen kot lakour, parmi en kantite lezot ankor.

Nesesite pour gouvernman revwar son polisi an sa ki konsern konstriksyon 50 met par lao contour line lo bann later prive ti en size ki ti nesesit bokou leksplikasyon.

Ler i ti reponn sa demann, Minis Dugasse ti fer remarke ki sa polisi ti ganny met an plas an akor avek zabitan Praslin. I ti dir ki sa ti ganny fer pa pour pini personn me pour protez labote sa zil.

Sa, i ti fer remarke, i rezon akoz viziter i kontinyen admir sa zil e vizit li. A sa pwen i ti demann bann zabitan pour pa detri sa.

Me anmenmtan Msye Dugasse ti admet ki i devret annan serten fleksibilite. Pour sa rezon i ti dir ki en lekip pe travay lo serten gidans ek polisi ki ava permet serten devlopman me dan en fason kontrole.

Lezot pwen ki ti bezwen bokou leklersisman ti enkli size konstriksyon lakaz, proze later, netwayaz zil sirtou bann dren ek lans.

Prezidan e minis konsernen ti asir bann zabitan ki gouvernman pou fer tou sa ki i kapab pour realiz ankor proze lakaz e later dan sa distrik me tousala enn fwa ki resours i vin disponib akoz sa i reste parmi priyorite gouvernman.

Prezidan ti osi enform zabitan sa distrik ki gouvernman i reste angaze pour kontinyen redwir pri lavi, kre plis lanplwa e mentenir bann lanplwa ki egziste e osi mentenir e met an plas bann mekanizm pour kontinyen asiste bann dimoun ki pli vilnerab.