Miting konsiltativ dan distrik Roche Caiman-Lekonomi pe montre siny redresman – Prezidan Michel


09-May-2009

Prezidan Michel pe adres bann zabitan Roche Caiman pandan miting konsiltativ ZediPrezidan Michel ti pe koz kot sizyenm rankont konsiltativ o nivo distrik ki ti pe deroul  Roche Caiman Zedi swar anba tenm “Koste Seselwa – Annou koz lo lavenir Sesel”.

I ti dir sa rediksyon dan lentere lo treasury bills i merit fer ki labank i kapab fer desann zot to lentere pour retourn 14%, ki pou met li zisteman lo menm nivo ki i ti ete avan reform ti komanse.

Prezidan Michel ti osi dir ki bann marsan ki pe refize fer desann pri zot marsandiz menm si ozordi en dolar pe vann selman ant 13 a 14 roupi pou byento oblize fer li avek nouvo lalwa lo fair trading ki Minister Finans pe al met devan Lasanble Nasyonal pour aprouvasyon.

Touzour lo size deviz (forex), Prezidan Michel ti fer remarke ki in fini sa letan kot dimoun ti bezwen al fer laliny deor labank depi 4er bomaten pour al aste deviz. I ti dir ki konmela tou sa ki anvi deviz i kapab gannyen e pour li sa i lakonplisman enn son langazman ki i ti fer avan dernyen eleksyon.

An pasan, i ti osi fer remarke ki ozordi nou nepli tann sa mo napa. Tou sa bann keksoz, Prezidan ti dir, i rezilta direk nou progranm reform ki ti komanse 6 mwan pase. En reform ki Prezidan Michel in repete i ti konnen pa ti pou fasil me ki ti kantmenm neseser.

En zabitan Roche Caiman i met devan son konsern

“Zis 6 mwan nou pe war rezilta ki sirprann lorganizasyon enternasyonal,” i ti dir e azoute ki sa bann bon rezilta in vin posib akoz lepep Seselwa in siport li ek son gouvernman.

Parey in leka dan bann rankont presedan, zabitan Roche Caiman in osi ganny sans poz kestyon e fer sizesyon lo bann size pertinan ki pe afekte zot parey problenm lakaz, vandalism, mankman bis, rol lazans lanvironnman, nesesite annan en stasyon lapolis dan distrik, sitiasyon doker ki depi Mars napa en lanplwa akoz bato pa pe vin lapes dan rezyon Sesel, e plizyer lezot ankor.

Alafen sa rankont -- ki ti asiste par Vis-Prezidan Joseph Belmont, tou bann minis, bann o zofisye dan gouvernman, Manm Lasanble Nasyonal e osi Ladministrater sa distrik -- Prezidan Michel ti remersye zabitan Roche Caiman pour zot bann kontribisyon tre valab e entelizan ki i ti dir pou ed gouvernman fer son travay pli byen.

I ti dir ki zis parey tenm pour sa lannen i demande, zabitan Roche Caiman “in koste akoz zot kontan zot pei.”
I ti azoute ki li i fermeman kwar dan linite akoz se sel fason pour avans devan.

“In ariv letan pour met politik deryer nou. Nou bezwen travay pour lepep e osi lavenir Sesel,” i ti dir.

Prezidan Michel ti osi azoute ki si nou koste, nou a pli byen kapab fer fas a bann defi e osi bann fleo dan nou pei. In ankor enn fwa donn son langazman pour li kontinyen trouv fason fer desann kou lavi e asire ki okenn dimoun ki dan bezwen pa ganny kit deryer.

Send your comment :

Name *

Email *

Comment *