Kominike Lapolis |12 May 2009

Konplenan, en madanm 52-an ki pa ti kot lakaz sa moman, i dir enn son vwazen ki ti enform li lo dife kot li.
Dapre rapor sete frer sa konplenan ki li a sa moman ti pe pase ki ti kas vit dan lakwizin, antre e tenny dife dan lakaz apre ki i ti’n dekonekte boutey gas.
Sa dife in fer domaz dan lakwizin ek dan salon.
I paret ki sa dife in ganny mete par ekspre.

Lanmor

Lapolis in raporte ki en zonm endyen aze 24-an ti ganny sertifye mor Sanmdi letan i ti ariv kot dokter “casualty” apre ki i ti’n tonbe sorti lo en lakaz Glacis.
Sa zonm, ki apel Kishar Valghi Tlalaie, ti en sarpantye avek lakonpannyen konstriksyon Shreeji.
Dapre 2 koleg endyen ki ti pe travay ansanm avek li sa zour, zot dir ki Tlalaie ti’n glise letan i ti pe fer mannev pour desann sorti lo lakaz.
Sa viktim ti’n sibir plis dimal dan latet.

Labi seksyel

Lapolis in raporte ki en zonm 38-an sorti Port Glaud in pas ankour koman sispe dan en ka labi seksyel lo en madanm.
Sa ka ti ganny raporte Sanmdi le 9 Me.
Sa sispe, ki ti ganny arete Dimans, in ganny rimann prizon Montagne Posee pour en semenn. I pou repas ankour Lendi le 18 Me.

Aksidan

En zonm  sorti Moulinyen Estate, Praslin i admit dan younit swen entansif lopital Victoria apre ki en pti bis ki i ti pe dray ti tap dan en baro pour lakonpannyen P.P.I. ki trouve St Joseph Praslin. Sa aksidan ti ganny raporte avek lapolis ver 1.35 Dimans granmaten. Sa viktim in sibir dimal dan figir e dan latet.
Letan aksidan ti arive sa zonm ti pe fer direksyon Anse Kerlan sorti Baie Ste Anne.
Lanket dan sa bann ka i an progre.