Prezidan i demande ki sistenm carer i ganny revwar


18-May-2009

Prezidan Michel in osi anonse ki gouvernman i an diskisyon avek Minister Finans pour trouv finansman pour bann progranm ki adres defi sosyal  parey prostitisyon ki pe vin en gro problenm dan pei, reabilitasyon prizonnyen, plis sipor pour bann lorganizasyon non gouvernmantal ki travay dan sa bann domenn e osi plis sipor pour bann mouvman lazenes e retraining pour bann zenn.

Prezidan Michel pe adres zabitan Takamaka pandan miting Sanmdi

Prezidan ti fer sa bann lanons pandan miting konsiltativ Takamaka Sanmdi apremidi.

Sa miting Takamaka  i 7enm ki Prezidan Michel e bann manm gouvernman pe fer dan tou distrik lo Mahe, Praslin ek La Digue.

Pour retourn lo sistenm carer ki fek met an plas, Prezidan ti dir ki sa ti ganny fer avek bann bon lentansyon -- pour met lord e elimin labi ek gaspiyaz me non pa pour pini okenn vye dimoun.

I ti dir i normal ki i annan serten defayans letan en nouvo sistenm i ganny met an plas e ki pa toultan ki keksoz i mars parey nou ekspekte.
Me sa ki enportan se ki kot i mal keksoz i ganny revwar e rearanze.

I ti dir ki dan tou distrik in annan bokou konplent lo sa nouvo sistenm e son biro in osi rikord bokou konplent lo sa size.

Prezidan ti ensiste ki minister ek lazans konsernen i retourn dan bann distrik pour revwar ka sak dimoun pour asire ki personn pa ganny kit deryer.

Prezidan ti dir ki pour li dinyite e konfor nou bann dimoun aze i en priyorite, i pou touzour en priyorite e i bezwen reste en priyorite.

En zabitan i met devan son konsern

Prezidan ti osi koz lo reform ekonomik ki pei pe pas atraver e ki an parti responsab pour anmenn plis problenm sosyal pour bann fanmiy.
 
La i ti fer remarke ki desizyon pour entrodwi sa reform lannen pase ti enn pli difisil ki in deza pran dan son karyer politik.

Sa akoz i ti konnen ti pou difisil pour lamazorite Seselwa me ki i ti bezwen fer li akoz i ti pou dan lentere Sesel e tou Seselwa.

I ti demann tou dimoun pour pa perdi lespwar akoz pti a pti keksoz pou kontinyen amelyore.

Parey dan tou lezot distrik, zabitan Takamaka osi ti’n vin rod leklersisman lo plizyer size, zot ti  annan bokou kestyon ek konsern me zot ti osi annan plizyer sizesyon ki zot ti partaz avek Prezidan e manm son gouvernman. Sa avek bi pour fer marse distrik e pei an zeneral.

Parmi bann pwen pertinan ki ti domin sa rankont ti bann defayans dan servis bis dan sa distrik ki enn parmi bann pli lwen avek lavil, retar dan bann kors ki Minister Ledikasyon i ofer, defayans dan servis lasante e la ti annan demann pour ki travay lo nouvo lopital Anse Royale i komanse o pli vit posib pour anmenn enpe soulazman pour bann zabitan rezyon sid ek was.

A sa pwen Prezidan ti enform zabitan Takamaka ki travay in fek komanse lo nouvo lopital Anse Royale.

Bann zabitan ti osi met devan bann problenm semen, akse avek lans, mank respe pour bann regilasyon konstriksyon lo lakot, lenfrastriktir sportif, sipor finansyel pour aktivite spor ek bann zenn, parmi lezot ankor.
Serten sizesyon ki bann zabitan ti met devan i enkli:

• plis konsiltasyon avek zabitan ek lotorite distrik avan ki bann proze i ganny konsevwar dan distrik;

• plis konsiltasyon ek kolaborasyon ant PUC, Lazans Transpor lo Later ek bann lakonpannyen telekominikasyon an sa ki konsern kas semen pour lenstalasyon zot bann fasilite;
 
• ki gouvernman i asire ki PUC pa finans lenvestisman delo pour bann biznes me plito ki bann lenvestiser i fer sa zot menm e pa met presyon lo servis PUC;

• ki SPTC i entrodwi en bord lansenny elektronik lo stenn anvil pour donn piblik lenformasyon lo mouvman ek servis bis a tou moman;

• ki gouvernman i konsider etabli en database lo profil tou Seselwa ki a fasilit latas gouvernman ler i bezwen lenformasyon lo en endividi parey dan ka alokasyon serten benefis ek servis parey carer.

Alafen sa rankont ki ti al pou preski de-z-erdtan Prezidan ti felisit dimoun Takamaka pour zot kontribisyon ki i ti dekri koman tre ris e ki pou ed gouvernman dan son bann plan ek proze pour lavenir.

Me Prezidan ti remet lanfaz lo nesesite pour tou dimoun koste e reste ini akoz i dir ki se selman si nou koste e reste ini ki nou pou kapab kontinyen realiz bann proze ansanm.

A sa pwen Prezidan ti demann tou zabitan pour les tou keksoz ki diviz nou deryer e avans devan ansanm dan linite.

Send your comment :

Name *

Email *

Comment *