Miting konsiltativ dan distrik Beau Vallon-Prezidan i salye lepep pour met politik bonmarse de kote |23 May 2009

« Linite i lakle pour progre. Nou pei i pour nou. Se nou ki bezwen travay pour nou pei, » i ti dir.

Prezidan ti azoute ki sa ki ti enpresyonn li pli bokou se lakantite zenn ki’n partisipe akoz lazenes se lakle nou lavenir. 

« Sa i montre zot lentere dan ini, met politik bonmarse deryer e travay pour nou pei, » i ti dir e asir zot ki i pou toultan la ek zot, pe travay pour zot e anmenn pei pli devan.

Prezidan Michel (3enm a gos) pe adres zabitan Beau Vallon pandan miting Zedi

Anfet, Prezidan Michel ti fer remarke o komansman sa rankont ki ti deroul anba tenm « Koste Seselwa – Annou koz lo lavenir Sesel » ki en keksoz  fondamantal ki in dekouver atraver bann miting ki in fer ziska prezan, se ki lepep in deside met politik bonmarse deryer e oule koz lo lavenir, dan en fason pour bouz devan.

I ti dir ki malgre lemonn in fors nou antre dan en reform, lefet ki lepep in koste, solider ansanm pandan sa bann dernyen set mwan (depi reform in komanse) nou pe war fri nou bann sakrifis ki nou’n fer e in asir zot ki pou annan plis ankor.

Beau Vallon i en distrik avek anviron 3000 zabitan e se aktivite tourizm ki dominan dan sa distrik. Etan donnen ki lendistri tourizm i enn bann pilye prensipal nou lekonomi alor i tou natirel si bokou kontribisyon ti lo sa size.

La ti annan sizesyon lo kwa ki kapab fer pour fer distrik pli atiran pour viziter.

Lezot pwen ki ti leve ti mank lefikasite lapolis, leksplikasyon lo det Sesel, leksplikasyon lo logmantasyon dan saler bann o zofisye dan gouvernman, revi dan saler travayer, sitiasyon semen segonder dan Gala, problenm mank bis Pascal Vilaz, problenm ki drayver taksi ki stasyonn kot lotel pe fer fas avek.

Ti annan sizesyon ki ler gouvernman oubyen lotorite konsernen i deal avek bann fleo e osi problenm sosyal ki pe afekte bann zenn, zot pa target zis viktim me osi predater.

Ti osi annan sizesyon ki lekol i travay pli pros avek distrik pour enplik zenn plis dan aktivite ki distrik i organize.

Lezot sizesyon ti demande ki labank i ofer bann servis parey credit card ki a ankouraz plis dimoun ki annan kont foreks deor ouver zot kont isi.

Ti osi annan sizesyon ki sekter prive i envesti dan kominote e ki gouvernman i konsider privatiz sant kominoter pour fer li pli vivan.

Konplent in osi ganny fer lo leta lekol segonder sa distrik e in ganny dir ki i pa zistifyab ki gouvernman i kontinyelman aranze e zanfan i kas sa bann lenfrastriktir.

Serten ansennyan ki ti koze ti osi sizere ki gouvernman i konsider transform enn son lekol segonder anvil dan en lekol vokasyonnel pour bann zanfan ki pa kapab adapte dan en lanvironnman akademik. Sa a ede rezourd de problenm, dapre zot -- enn se sa problenm vandalizm e lot ede annan mendev kalifye.

Kestyon ti osi poze lo kan eski sant lasante Beau Vallon pou pare e larepons ki ti gannyen sete ki Minis Finans pe aktyelman rod en pe larzan e ki sa fasilite pou pare avan lafen lannen.