Prezidan i dyalog avek zabitan Port Glaud lo lavenir pei |25 May 2009

Prezidan Michel -- ki ti pe koz kot 9enm rankont konsiltativ anba tenm “Koste Seselwa – Annou koz lo lavenir Sesel ki ti deroul dan sant kominoter Port Glaud Sanmdi -- ti eksplike ki sa bann biro i merit annan servis voicemail ki a permet dimoun kit mesaz e ki lotorite konsernen a kapab rekontakte zot apre.

Prezidan Michel ti azoute ki atraver bann rankont presedan kot in ganny sans ekout dimoun eksprim zot lekor e esanz nide, in realize ki ti en bon desizyon pour li organiz sa bann rankont ki en lenspirasyon pour gouvernman fer pli byen.

In osi dir ki i enportan met an plas en sistenm ki pou permet annan pli bon dyalog ant gouvernman santral ek distrik akoz i enportan ki dimoun i annan en lavwa dan desizyon ki ganny pran.

Zisteman sa rankont Sanmdi ti enn ki ti permet gouvernman vwar ki pa tou desizyon ki in pran ki dan lavantaz distrik. Enn bann tel desizyon ti sa enn pour tir dokter dan distrik Port Glaud e osi Beoliere ki konsekaman parey zabitan ti fer resorti in koz bokou problenm.

Lo sa size, Prezidan Michel e osi Minis pour Lasante Madanm Marie-Pierre Lloyd ti eksplike ki tou bann desizyon pe ganny revwar anmezir reform i ale akoz se selman kan zot ganny met an pratik ki nou vwar kot i annan defayans.

Kot sa rankont, Prezidan Michel ti osi profite pour demanti alegasyon fer dan zournal Regar semenn pase konmkwa li i pe konstri en vila lo zil Desroches. I ti dir ki sa i en lakizasyon malisye ki’n ganny fer avek bi asasin son karakter e esey fer dimoun perdi konfyans dan li e dan travay ki i pe fer.

Prezidan in ankor enn fwa repete ki i enportan ki nou toultan onnet e fran e aret fer politik bonmarse e asasin karakter lezot.

Prezidan ti osi anonse pandan miting Sanmdi ki en nouvo sef ziz i ekspekte sermante ver mwan Out e ki sa i ava ede akseler bann ka ki ankor devan lakour. Sa ti vin an repons konsern eksprimen par en zabitan konmkwa bann ka devan lakour pe tro tarde.

Parmi bann lezot konsern ki ti ganny met devan dan sa rankont, ki ti dir anviron 2er-d-tan edmi, ti mankman bis lo semen, sizesyon ki i annan quality control dan pei ki a asire ki konsonmater i ganny valer pour zot larzan, demann ki laysennsing i vin pli serye lo bann kontrakter ki zis pran larzan dimoun e pa fini fer zot travay. Ti osi annan sizesyon ki en ban i ganny enpoze lo biznes lakanbiz pandan lazournen. Ti annan partisipan ki ti osi propoz en servis ou sant reabilitasyon pour bann zenn delenkan ki paran napa kontrol lo zot.

Konplent ti osi ganny fer lo problenm delo ki serten fermye pe fer fas avek dan distrik e osi sa loder ki sorti kot faktori IOT ki pe afekte lavil.

Ti osi annan sizesyon ki sa de lakonpannyen ki pe fer lotel dan distrik i ganny demande pour konstri en trotwar ki a rann sa morso semen ki al Port Launay pli an sekirite pour pyeton.

Alafen sa rankont, Prezidan Michel ti dir ki sa legzersis ki li ek son gouvernman pe fer pa enn dan vid me enn serye. I ti dir ki in donn lenstriksyon tou minister pour etidye tou ka ki souleve e plitar retourn kot lepep pour rann kont lo aksyon ki’n pran e eksplike akoz serten pa kapab ganny enplimante. 

Miting Sanmdi ti deroul dan prezans Vis-Prezidan Joseph Belmont, bann minis dan gouvernman, Manm Lasanble Nasyonal ek ladministrater sa distrik, osi byen ki o zofisye dan gouvernman ek lakonpannyen paraetatik.