Miting konsiltativ Grand Anse Mahe-Prezidan i asir en gouvernman ki delivre e servi lepep |01 June 2009

Vi ki ozordi le premye Zen i lafet zanfan, Prezidan Michel in osi lans lapel ek bann fanmiy Seselwa pour okip zot zanfan byen akoz se zot lavenir nou pei.

In demann tou paran pour pran en rezolisyon pour okip zot zanfan byen akoz se zot ki annan sa responsabilite primordyal.

Prezidan Michel ti fer sa remark kot 10enm rankont konsiltativ ki organize anba tenm “Koste

Seselwa – Annou koz lo lavenir Sesel” ki ti pe deroul Grand Anse Mahe Sanmdi.

Pandan sa rankont Sanmdi – ki ti asiste par Vis-Prezidan Joseph Belmont, bann minis, manm lasanble nasyonal ek ladministrater sa distrik, osi byen ki plizyer o zofisye dan gouvernman ek lakonpannyen paraetatik -- konsern ti ganny fer resorti lo lakantite zanfan ki pa al lekol oubyen ki lo semen pe fer prostisyon e osi fim drog.

Prezidan in ankor enn fwa fer remarke ki sa bann tel rankont dan distrik pe permet zot war defayans dan lenplimantasyon reform akoz se ler zot al dan distrik ki zot war realite.

In ankor enn fwa angaz son lekor pour fer sir ki i annan ase travay dan pei pour tou dimoun ki anvi travay.

I ti dir ki i pa pe menaz okenn zefor pour fer desann pri lavi menm si i annan fakter eksteryer ki enfliyans sa. I ti osi fer resorti ki proteksyon ek lasistans pour bann ki pli vilnerab i reste enn son priorite.

Zisteman parmi bann konsern ki ti souleve ti annan size klinik Beoliere ki zabitan in demande i ouver 24er lo 24 toulezour. Prezidan Michel ti komant lo sa size klinik Beoliere an dizan ki sa i en size tre emotiv dan sa rezyon vi ki son semenn avan, zabitan Port Glaud ti’n fer monte menm pwen.

I ti dir i konpran zot konsern e asir zot ki sa pe ganny revwar.
Leksplikasyon ti osi ganny donnen akoz sa laranzman ti neseser --- enn se ki ti annan en mank dokter e dezyenm se en mezir pour koup lo depans .

Lezot konsern ki ti leve ti lo servis ki lapolis i ofer, en stasyon petrol pour sa distrik, e osi mank bis lo semen sirtou La Misere. La ti annan sizesyon ki bis ki lo kontra, par egzanp bann ki pe anmenn lanterman, ler zot retourn anvil si zot vid zot pran pasaze ki zot zwenn dan semen. Lo sa pwen, Minis Morgan ti dir i pou donn en lenstriksyon SPTC pour fer sa.

An sa ki konsern stasyon petrol, Prezidan Michel in anonse ki demars i an progre pour ouver enn dan sa distrik.

Ti osi annan sizesyon ki semen Grand Anse Mahe i ganny aranze e ki lalimyer i ganny mete dan bann landrwa ki vreman bezwen.

Leksplikasyon ti osi ganny demande e donnen lo later lagrikiltir dan sa distrik.

Pri lavi ti en lot size konsern sirtou pri ki marsan pe sarze pour bann komodite dan laboutik  menm si to lesanz pe desann.

Bann zabitan in osi sizere ki lotorite distrik i ganny konsilte ler bann desizyon enportan pe ganny pran ki pou annan lenpak lo kominote.