Kominike Lapolis -Lanmor Msye France Henriette |16 June 2009

Msye Henriette, en biznesmenn, ti ganny atake dan son lakaz obor semen Bel Ombre ant minwi a 1er bomaten Sanmdi le 6 Zen dan en lensidan ki lapolis pe prezimen i en ka mert.

Swivan serten larestasyon fer pandan wikenn, 3 sispe in ganny anmennen devan lakour yer e tou le 3 in ganny rimann an detansyon legal pour 14 zour.

Parmi sa bann sispe i egalman annan prizonnyen sove Patrick Sopha. Nou ava rapel ki Sopha ti ganny ratrape par lafors sekirite pandan wikenn.

Sa de lezot sispe i en zonm 27-an sorti Beau Bel ek enn 23-an sorti St Louis. Tou le 3 sispe pou repas ankour le 30 Zen.
Antretan lapolis pe kontiny zot lanket dan sa lensidan trazik.

Latak ek vol arme

Lapolis in osi raporte ki 2 parmi sa 3 sispe ki ti ganny rimann le 1 Zen an koneksyon avek latak arme e vol kot stasyon petrol Beau Vallon le 27 Me in ganny rimann pour ankor 14 zour.
Sa 3enm sispe li in ganny large san kondisyon.

Swivan kontinyasyon lanket dan sa ka en lot sispe parkont in ganny arete e sa se Patrick Sopha ki pe rimann li osi ziska le 30 Zen.

Kondannasyon pour kas lakaz e vole

Lapolis in raporte ki Ron Victor, aze 19-an ki reste Anse Royale, in kondann 1-an prizon pour lofans kas lakaz e vole.
Victor ti ganny arete Zedi le 11 Zen, pas ankour son landmen Vandredi kot i ti ganny sarze.

Apre ki i ti’n pled koupab pour sa lofans, lakour ti rimann li e anvoy yer pour pas santans lo li. Annefe Victor in kondann 1-an pour kas lakaz ek en lot 1-an pour vole, me lakour in ordonnen ki son 2 term prizon i mars ansanm.

Sa menm Victor in fer laplikasyon pour ed legal devan lakour an koneksyon avek en lot sarz kas lakaz e vole ki ti arive Sweet Escott Mardi pase pandan lannwit. Swivan lanket dan sa enn ka, tou propriyete in fini ganny rekipere par lapolis. Sa lofans i anmenn en kondannasyon mandatwar 5-an prizon.

Aksyon piratri

Sa 3 akize Somalyen ki ti ganny arete le 2 Me an koneksyon avek aksyon piratri dan lanmer Sesel osi byen ki sa 11 lezot ki ti ganny arete le 4 Me pour lapes ilegal ek posesyon aminisyon in repas ankour yer kot zot in reganny rimann pour ankor 14 zour.
Tou le 14 zonm pou repas ankour le 30 Zen.

Labi seksyel

Lapolis in raporte ki en zonm 31-an sorti Anse Aux Pins in ganny rimann koman sispe dan en ka labi seksyel. Viktim sa lensidan i en madanm 35-an ki egalman sorti dan sa menm distrik. Lensidan ti ariv Sanmdi apremidi e sa sispe ti ganny arete son menm zour aswar. I pou repas ankour Vandredi le 19 Zen.

Vol

En zonm 21-an sorti Plaisance in ganny rimann prizon Montagne Posee ziska le 30 Zen koman sispe dan plizyer ka vol ki’n arive dan distrik Mont Fleuri tou dernyenman.
Sa zonm, ki ti ganny arete Dimans, i annan osi lofans bles son kanmarad ki’n ganny anrezistre kont li.