Kastor lo lasenn … 25-an plitar avek Mahe Chamber Choir |27 June 2009

Pyes mizikal Kastor in toultan reste vivan dan memwar piblik Seselwa. Zistwar sa lesklav ki ti reisi defye lord bann komandan lo Zil d'Abondans e sov dan lafore in kaptir latansyon e zwe lo lemosyon bokou dimoun.

25-an plitar, Mahe Chamber Choir ansanm avek Raymond Clarisse in deside fer reviv sa pyes mizikal dan en nouvo prodiksyon ki pou mont lo lasenn aparti 7.30 tanto. Mahe Chamber Choir -- ki sa lannen pe selebre 5-an son legzistans -- i ensiste ki zot pe ofer piblik Seselwa en versyon Kastor ki otantik pour son lepok, enn ki selebre valer melodik sa pyes, ki demontre tou sa lemosyon mir ki sorti ladan.

Meter-an-senn e direkter artistik Mahe Chamber Choir, Raymond Clarisse, i swete ki piblik Seselwa i ava apresye travay ki zot in fer pandan plis ki 6 mwan.

“Kastor i en pyes ki ofer bokou bataz pour nou lakoral kapab eksprim nou ki swa dan en konteks teatral ou mizikal,” Raymond in dir.

Rol Kastor dan sa enn versyon pou ganny zwe par Renny Bijoux, en zenn tre polivalan ki ti annan zis 2-an letan ki Kastor orizinal ti mont lo lasenn.

“Mon fyer pour ganny sans zwe en rol parey e mon swete ki mon versyon Kastor i enn ki piblik Seselwa i apresye,” Renny i dir.
En albonm avek tou bann sanson pyes mizikal “Kastor, Nesans en Pep” par Mahe Chamber Choir i sorti tanto dan gran premyer ki pou fer kot Sant Konferans Enternasyonal (ICCS).

Sa nouvo prodiksyon pou ganny repete pour manm piblik Vandredi le 3 ek Sanmdi le 4 Zilyet apartir 7er diswar menm landrwa.