Follow us on:

Facebook Twitter LinkedIn YouTube

Archive - Archive 2004 - July 2013

Miting konsiltativ Riviere Anglaise-Prezidan i remet lanfaz lo lenportans travay ansanm dan linite |04 July 2009

Miting konsiltativ Riviere Anglaise-Prezidan i remet lanfaz lo lenportans travay ansanm dan linite

Prezidan Michel ti pe koz dan distrik Riviere Anglaise Zedi apremidi pandan 11enm rankont konsiltativ anba tenm Koste Seselwa : Annou koz lo lavenir Sesel.

Parey in fer dan bann miting presedan, Prezidan Michel ti rapel bann partisipan kot sa rankont ki son bi se pour ranpli en langazman pour li rankontre lepep Seselwa, diskit avek zot e osi ekout zot kontribisyon ki zot annan pour fer.

En zabitan i met devan son konsern pandan miting Zedi

Parey labitid, Prezidan Michel ti akonpannyen par Vis-Prezidan Joseph Belmont, tou son bann minis e o zofisye dan son gouvernman vi ki sa i osi lokazyon pour zot osi not bann konsern ek problenm ki ganny fer resorti avek bi pran aksyon pour rektifye zot.

Andotmo, bi sa legzersis se pour permet gouvernman fer pli byen son travay e reponn dan en fason efikas a bann bezwen lepep.

Prezidan Michel ti fer remarke ki letan zot organiz bann tel rankont zot pa pe espekte war popilasyon en distrik antye desann pour asiste me ki sa ki enportan se ki zot donn sa loportinite zabitan sa distrik pour kontribye zot lopinyon e rankontre zot Prezidan e bann manm gouvernman e fer kontribisyon enpe dan lespri « koste ansanm, ini e kontribye pour fer marse nou pei ».

I ti rapel zot ki mwan Zen ki fek fini in enn sarze avek plizyer lanniverser, bann levennman ki’n mark nou listwar.

« In ed nou reini koman en nasyon, koman en pep, permet nou travay e pran bann aksyon e devlop nou pour nou kapab ozordi fer sa ki nou kapab fer, regard kanmarad dan lizye e dir ki nou fyer nou en Seselwa, » i ti dir.

I ti azoute ki se sa bann levennman ki nou selebre pandan mwan Zen ki permet nou ozordi koman en pep zwenn ansanm.

« Nou bezwen travay ansanm. Nou bezwen ini. Nou bezwen kontribye pour fer avanse nou pei, » i ti dir avan lasal ti ouver pour bann kontribisyon ek konsern.

Parmi bann konsern ki ti ganny souleve ti annan enn lo depar volonter kot ti annan sizesyon ki zis dimoun lopozisyon ki ti’n ganny afekte par sa skim. La Prezidan ti eksplike ki bi Depar Volonter sete pour redwir lakantite dimoun ki ti travay dan gouvernman pour ki i vin pli efikas e bokou pli performan e anmenmtan dan en fason kot bann ki pran depar volonter i annan mekanizm ki’n ganny met an plas kot zot ganny ede trouv lezot travay oubyen fer bann pti biznes.

I ti dir ki sete Minister Lanplwa ki ti responsab pour met an aplikasyon sa proze e ki i krwar ki dan son mazorite in mars byen. I ti fer remarke ki laplipar zot in osi ganny plase dan lezot travay.

Lo size logmantasyon dan pri lavi fas a sa reform ekonomik ki pei pe pas atraver aktyelman, Prezidan Michel ti rekonnet sa e fer remarke ki keksoz pe amelyore la ki to lesanz in desann.

I ti profite pour remersye lepep Seselwa pour zot linite, konprenezon ki malgre nesesite e difikilte sa reform, nou’n tenir e ozordi nou pe war sa rezilta kot to lesanz ek to lentere in desann e kot lezot paramet dan lekonomi in osi stabilize.

I ti asir zot ki dek ki lekonomi i vin pli performan, pri lavi osi pou kontinyelman desann. « Menm si aktyelman pa tou keksoz ki kapab aranze dizour o landmen, i pran en pe letan, i sel semen ki nou ti annan pour nou swiv e nou pe komans war rezilta. Mon sir ki si nou tou nou solider deryer reform, nou pou kontinyen war bann rezilta ki a donn nou en bon lekonomi o pli vit posib, » i ti dir.

Prezidan ti azoute ki o fir e anmezir ki reform i marse e ki lezot keksoz i tonm anplas, i a pli fasil pour bann dimoun kapab soutenir zot lekor an sa ki konsern pri lavi dan nou pei.

Lezot pwen konsern ti bann lenfrastriktir dan distrik, problenm bis ek semen pour zabitan Majoie anler, pri tiket bis, lasistans pour carer, sizesyon lo fason pour rezourd problenm delo, reorganizasyon dan zidisyer, eksetera.

Prezidan Michel ti fer remarke ki laplipar bann konsern ki ti’n souleve ti’n kapab ganny rezourd dan bann lezot miting atraver striktir etabli dan distrik me sa pa ti leka akoz en mank kominikasyon.

« La kot serten ti a kapab ganny rezourd oubyen kot pa kapab zot ti a ganny leksplikasyon lo bann kontrent ki annan e osi plan ki annan pour rezourd sa bann problenm, » i ti dir.

» Back to Archive