Festival Kreol i re-lans konpetisyon sanson |14 August 2010
Kordinater sa konpetisyon, David Andre, i dir ki sa lannen pou napa en tenm spesifik.
“Festival Kreol i reflekte kiltir Kreol Seselwa e bann ki anvi partisip dan konpetisyon sanson i lib pour swazir nenport tenm relye avek sa,” i ti dir.
“Napa restriksyon lo kalite size ki bann artis i devret trete dan zot konpozisyon. Nou pa oule zot santi zot kwense pour tret en tenm spesifik alors nou pe ekspekte ki sa i ava osi ede ankouraz zot pour vin avek bann travay inovativ e orizinal."
Konpetisyon sa lannen i ouver pour bann artis lokal selman e pou napa okenn kategori -- savedir bann amater, semi-profesyonnel ek profesyonnel pou ganny groupe anba en sel kad.
Bann organizater pe met bokou lanfaz lo orizinalite bann sanson e Msye Andre in dir ki sa i enn bann kriter ki ziri pou servi parmi lezot tel ki kreativite, parol ek relevans avek nou kiltir.
« Nou pe ensiste ki bann sanson ki ganny soumet pa’n zanmen ganny komersyalize an form CD ou dan okenn lezot fason e osi pa’n zanmen ganny zwe an piblik, » i ti azoute.
“Okenn sanson ki pa zwenn sa bann kriter pou otomatikman ganny diskalifye.”
Msye Andre in dir i konvenki ki bann partisipan i annan potansyel pour vin avek bann bon travay, e ki bann sanson ki ganny vote konman meyer ava ganny byen rekonpanse.
Gannyan premye pri pou resevwar 25 mil roupi, dezyenm pri 15 mil roupi e trwazyenm pri 10 mil roupi.
Komite Festival Kreol i rezerv drwa pour servi sanson bann artis dan serten son bann aktivite e osi lezot promosyon relye avek sa festival, me ki drwa moral e ekonomik pou reste pour sa bann artis.
Msye Andre i dir ki dernyen dat pour soumet bann sanson – lo en CD, avek en kopi son bann parol atase avek – kot sekretaryat Festival Kreol i le Premye Oktob.
I.H.