Follow us on:

Facebook Twitter LinkedIn YouTube

Archive - Archive 2004 - July 2013

Maren bato ton pou ganny logmantasyon dan saler de baz |17 November 2010

Sete Minis pour Lenvestisman, Resours Natirel ek Lendistri Peter Sinon ki ti dir sa pandan sesyon kestyon dan Lasanble Nayonal yer.

Sa ti apre ki manm elekte pour distrik Bel Ombre Nicolas Prea ti demande si gouvernman pe adres sitiasyon nou bann maren Seselwa ki pe travay lo bann bato Linyon Eropeen avek bi ki zot ganny en saler ki pli egal avek maren lezot nasyonalite vi ki zot desarz menm responsabilite.

Minis Sinon ti dir ki gouvernman in fini adres sa problenm depi Me lannen pase e en nouvo kondisyon lapey pour sa bann maren i ganny defini anba en protokol lapes ant Linyon Eropeen ek Sesel ki pou pran lefe apartir le 1 Zanvye lannen prosenn.

Dapre sa protokol, ki valid ziska 2013, lapey sa bann maren Seselwa pou ganny peye par bann propriyeter bato.

Sa bann propriyeter pou bezwen siny en lagreman avek lotorite konpetan dan Sesel.

I ti azoute ki kondisyon lapey bann maren Seselwa pa pou pli ba ki bann ki fer menm kalite travay lo lezot kalite bato e dan okenn ka pa devret pli ba ki standar etabli par Lorganizasyon Enternasyonal pour bann Travayer.

Minis Sinon ti dir ki ler zot ti ganny alerte lo sa sanzman, Linyon Eropeen ti fer resorti ki sa lorganizasyon napa okenn minimonm standar ki’n etabli pour maren lo bato lapes.

Zot ti dir ki sa lorganizasyon i selman fer provizyon pour en lapey minimonm pour maren lo bann bato komersyal e sa lapey i 543.92 dolar Ameriken, swa en valer R6608.62.

Minis ti fer resorti ki Lasosyasyon Ton Eropeen in dakor avek lotorite Linyon Eropeen ki tou maren peser sorti dan bann pei Lafrik, Karaib ek Pasifik pou ganny peye sa menm sonm ler zot komans lapes lo bato ton.

Pandan sesyon bann manm ti osi demann kestyon lo proze Bazar Roche Caiman ki pou al komanse tre byento pros kot Eden Island e bazar Riviere Anglaise kot travay in deza komans fer lo la pros kot biro brans.

» Back to Archive