Lekol eksepsyonnel i ouver son zarden medisinal |29 December 2010

Serten envite ki ti pe asiste en fonksyon resaman kot lekol ti profite pour fer en pti letour dan sa nouvo zarden medisinal

Dapre enn bann ansennyan ki ansarz sa proze, Milona Fideria, sa zarden i form parti progranm terapi pour bann etidyan kot sa lekol.

“Trwa-z-an pase nou ti deside pour nou fer sa zarden, e nou ti komans rod bann pti plan ki nou’n met pran e kit la, me lannen pase nou’n komans travay entansivman lo sa proze,” Manmzel Fideria ti dir.

“Bann zanfan in ede atraver ranpli bann kabos, oubyen menm met bann pti fler ki nou’n fer pran, zot in osi ede par saroy delo pour aroz bann fler e aras bann zerb ki annan dan zarden.”

“I anmenn en kantite benefis pour bann zanfan akoz nou progranm i lo bann skil ki neseser pour viv toulezour,”

“Sa zarden pou osi ede ki bann zanfan i konnen ki mannyer sa bann plant medisinal i kapab ed zot e osi ankouraz zot pour fer enn kot zot lakour, » Manmzel Fideria ti eksplike.

Toudmenm bann ki responsab sa zarden in osi ganny led pour kapab anbelir li en pe plis atraver konsey ki zot in resevwar avek bann zofisye kot Nature Seychelles – ki osi annan en tel zardenn – bann ansennyan kot lekol menm e lezot donater ki’n reponn zot lapel pour ede avek sa proze.

Tandis ki Peter Estico in donn konsey lo lanplasman bann plant dan zarden – ki’n ganny mete dan laform en soley.

Manmzel Fideria in dir ki zot in plant bokou sitronnel akoz bann zanfan i kontan bwar bann pti enfizyon.