Kominike Lapolis |22 January 2011

Oreddy in ganny trouve koupab pour son rol zwe dan lensidan kot en zonm Endyen ti severman ganny dimal dan son figir apre ki i ti’n ganny atake e vole serten sonm larzan ki i ti pe al met labank.

Lensidan ti ariv Foret Noire le 12 Fevriye 2010.

**********

Lapolis in raporte ki sa madanm 30-an ki reste Roche Caiman ki ti pe rimann koman sispe dan en lensidan vol kot en labousri dan lavil Sanmdi pase in repas ankour yer kot in ofisyelman ganny sarze.

Lakour in ordonnen ki sa akize i kontinyen reste rimann ziska le 4 Fevriye zour ki i pou repas ankour.

Sa akize, ki ti ganny arete Merkredi bomaten, ti pas ankour pour premye fwa son menm zour apremidi.

**********
 
Lapolis in osi raporte ki swivan lentansifikasyon dan son progranm ot vizibilite, in annan plizyer endividi ki’n ganny arete e ganny penalize pour lofans parey akt endesan, bwar e zwe kart dan landrwa piblik.

I osi annan serten ki’n ganny penalize pour dray dan fason danzere, dray ek lalimyer ki pa bon ek lezot lofans asosye avek regilasyon trafik.

Lanket kont serten larestasyon pour bann lofans kriminel parey vol i an progre.

Lapolis antretan pe averti tou motoris pour regle bann defayans ki annan avek zot transpor, fer sir ki zot patant ek lasirans i annord, tandis ki manm piblik an zeneral pe ganny demande pour pran enpe plis zot responsabilite e annan plis respe pour bann lalwa ki asosye avek lord piblik.